WWF: 2050 jylǵa qaraı adamzat azyq-túlik tapshylyǵyna ushyraýy múmkin
ASTANA. QazAqparat - Eger Jer turǵyndarynyń sany búgingideı qarqynmen ósse, al taǵamdy óndirý jáne adamdardyń suranystary ózgermese, onda 2050 jylǵa qaraı adamzat azyq-túlik tapshylyǵynan zardap shegedi, delingen Dúnıejúzilik tumsa tabıǵat qory (WWF) daıyndaǵan baıandamada, dep jazady RIA Novostı.
"Qazirdiń ózinde aýyl sharýashylyǵyndaǵy qajettilikter úshin jerdiń 50%-y paıdalanylady. Taǵam óndirisi qorshaǵan ortaǵa áser etip, ony ózgertetin faktorlardyń biri", - delingen WWF úshin Metabolic kompanııasy daıyndaǵan baıandamada.
Baıandamada kórsetilgendeı, taǵam óndirisi kezinde parnıktik gazdyń 25-30% bólinedi. Bul klımattyń ózgerýine áser etedi. Adam paıdalanatyn sý resýrstarynyń 69%-y aýyl sharýashylyǵyndaǵy qajettilikter úshin jumsalady. Aıta ketý kerek, aýyzsý Jerdegi sýdyń 3%-yn ǵana quraıdy.
"Tutynýshylardyń teńiz ónimderine degen qyzyǵýshylyǵy 90% teńiz balyqtarynyń aýlanýyna túrtki bolyp otyr. Bul resýrstardyń azaıýyna ákelýde - kóp jaǵdaıda balyqtardyń, sý jándikteriniń ósip-ónýin qalypqa keltirý múmkin bolmaıdy", - delingen baıandamada.
BUU Azyq-túlik jáne aýyl sharýashylyǵy uıymynyń (FAO) málimetinshe, búginde azyq-túlik óniminiń 31%-y laqtyrylýda. Adam paıdalana alatyn taǵam «shyǵyny» 1,3 mıllıard tonnaǵa baǵalanyp otyr. Al álemde 795 mıllıon adam toıyp tamaq ishýge zárý. Qajetsiz dep laqtyrylǵan taǵamnyń shıreginiń ózi bul adamdardy tamaqtandyrýǵa jeter edi.
