WTA týrnıri: Elena Rybakına alǵashqy kezdesýinde jeńilip qaldy

ASTANA. KAZINFORM – Er-Rııadta (Saýd Arabııasy) ótip jatqan WTA qorytyndy týrnırinde Qazaqstannyń birinshi, álemniń 5-raketkasy Elena Rybakına alǵashqy matchyn ótkizdi.

Qazaqstandyq tennısshi óz tobynda betashar oıynda álemniń 4-raketkasy, ıtalııalyq Jasmın Paolınımen sheberlik baıqasty.
Qarsylastar osyǵan deıin tórt ret kezdesip, eki-ekiden jeńiske jetken edi.
Bul AQSh ashyq chempıonatynan beri kortqa shyqpaǵan E.Rybakınanyń birinshi básekesi edi.
Birinshi partııada ıtalııalyq tennısshi 4:2 esebimen alǵa shyqqanymen, Rybakına tarazy basyn teńestirdi. Alaıda taı-breıkte Paolını sátti oınady – 7:6 (7:5).
Ekinshi sette esep 3:3 bolǵan mezette ıtalııalyq sportshy breık jasap ketti – 4:3. Aqyry degenine jetti – 6:4.
Eki saǵatqa jýyq ýaqytqa sozylǵan tartysty báseke barysynda Rybakına 8 eıs jasaǵanymen, 5 breık-poınttyń bireýin ǵana paıdalandy. Paolınıdyń úlesinde – 2 eıs, 2 breık (5 breık-poınt).
E.Rybakına kelesi kezdesýin 4 qarasha kúni álemniń 7-raketkasy, qytaılyq Chjen Tsınvenmen ótkizedi. Qytaılyq tennısshi birinshi matchynda álemniń 1-raketkasy, Belarýs ókili Arına Sobolenkoǵa ese jiberdi – 3:6, 4:6.
Ár toptan eki úzdik oıynshy jartylaı fınalǵa joldama alady.
Eske sala keteıik, budan buryn Goran Ivanıshevıchtiń Elena Rybakınanyń bapkeri bolǵanyn jazǵan edik.