WTA reıtıngisi: Elena Rybakına upaı qoryn tolyqtyra ala ma
ASTANA. KAZINFORM – Áıelder tennısi qaýymdastyǵy (WTA) AQSh-taǵy Maıamı týrnırinen keıin jańartylǵan reıtıngini jarııa etti.
Maıamıde chempıon atanǵan Belarýs ókili Arına Sobolenko 11 025 upaımen burynǵysha kósh bastap keledi.
Atalmysh jarysta jartylaı fınalǵa deıin jetip, A.Sobolenkoǵa ese jibergen qazaqstandyq Elena Rybakına 8 108 upaımen ekinshi oryndy ázirge nyq ustap tur.
Maıamı fınalısi, amerıkalyq Korı Gaýff 7 278 upaımen úzdik úshtikti túıindedi. Ol Polsha ókili Iga Shventekti (7 263 upaı) tórtinshi satyǵa yǵystyrdy.
E.Rybakına úshin endi topyraq tósenishindegi maýsymdy barynsha sátti ótkizý asa mańyzdy bolmaq. Sonda reıtıngide A.Sobolenkoǵa jaqyndaı alady.
Qazaqstannyń úzdik tennısshisi aldaǵy aıda Shtýtgart (Germanııa) WTA 500 jarysynda baq synaıdy. E.Rybakına osy dodada 2024 jyly úzdik shyqqan bolatyn. Al ótken jyly Qazaqstan quramasy sapynda Bıllı Djın Kıng kýbogynda el namysyn qorǵaǵandyqtan, Shtýtgart dodasynan tys qalǵan edi. Sondyqtan bıyl upaı qoryn tolyqtyra alady. 2025 jyly A.Sobolenko Shtýtgartta fınalǵa deıin jetip, latvııalyq Elena Ostapenkodan jeńilip qalǵan edi.
Osy aptada Charlston (AQSh) WTA 500 týrnırinde óner kórsetetin ıÝlııa Pýtıntseva 921 upaımen álemdik reıtıngide 75-ten 72-ge kóterildi.
Zarına Dııas 312-den 306-ǵa aýyssa, ótken aptada Úndistandaǵy jarystyń absolıýtti jeńimpazy atanǵan Jibek Qulambaeva 419-dan 422-ge tómendedi.
Astana qalasynda 10-11 sáýir kúnderi Bıllı Djın Kıng kýbogy aıasynda ótetin Qazaqstan – Kanada matchyna ulttyq quramaǵa shaqyrtý alǵan Arýjan Saǵyndyqova 769 (+8), Sonıa Jıenbaeva 1 019-satyda tur.
Qazaqstannyń juptyq syndaǵy birinshi raketkasy Anna Danılına Maıamıdegi sátsizdikten keıin 4-ten 7-orynǵa túsip qaldy.
WTA chempıondyq kestesinde Arına Sobolenko 3 800 upaımen birinshi orynǵa shyqty. Elena Rybakına 3 483 upaımen ekinshi satyǵa yǵysty. Amerıkalyq Djessıka Pegýla (2 405) úshinshi orynda.
Eske sala keteıik, budan buryn Jibek Qulambaevanyń Úndistandaǵy týrnırdiń absolıýtti jeńimpazy atanǵanyn jazǵan edik.
Sondaı-aq Tımofeı Skatov Marokkodaǵy týrnırdi sátti bastady.
ıÝlııa Pýtıntsevanyń Charlston týrnırindegi qarsylasy anyqtaldy.
