WTA-nyń jańartylǵan reıtınginde Rybakına 3, Danılına 44-orynǵa kóterildi

Áıelder tennısi qaýymdastyǵy (WTA) jańartylǵan reıtıngin jarııalady, dep habarlaıdy Kazinform.

Jekeleı synda polshalyq tennısshi Iga Shventek burynǵysha kósh bastasa, Belorýs ókili Arına Sobolenko ekinshi orynda tur. 

Keshe Brısben WTA 500 týrnıriniń chempıony atanǵan qazaqstandyq Elena Rybakına 6 811 upaımen amerıkalyq Korı Gaýfty (6 660 upaı) artqa tastap, úshinshi satyǵa kóterildi. 

Taǵy bir qazaqstandyq ıÝlııa Pýtıntseva 63-ten 64-ke tómen syrǵydy.

Juptyq synda Qazaqstannyń birinshi raketkasy Anna Danılına Oklend (Jańa Zelandııa) WTA 250 jarysynda úzdik shyqqannan keıin 54-ten birden 44-orynǵa kóterildi. Onyń sol jarysta birge óner kórsetken juby, slovakııalyq Vıktorııa Grýnchakova 84-ten 73-ke joǵarylady. 

Rybakına juptyq syn reıtıngisinde 124-ten 125-ke, Jibek Qulambaeva 143-ten 144-ke tómendedi. 

Eske sala keteıik, budan buryn Elena Rybakınanyń baıyrǵy qarsylasyn jeńip, Brısben týrnıriniń jeńimpazy atanǵanyn jazǵan bolatynbyz. Sondaı-aq Anna Danılına Jańa Zelandııadaǵy jarysta jeńis tuǵyryna kóterildi. 

Rybakınanyń Aýstralııadaǵy týrnırde kimmen kezdesetini de belgili boldy.