WTA qorytyndy týrnıri: Elena Rybakınanyń jartylaı fınaldaǵy qarsylasy anyqtaldy

ASTANA. KAZINFORM — Er-Rııad qalasynda (Saýd Arabııasy) ótip jatqan WTA qorytyndy týrnıriniń jartylaı fınalyna shyqqan tennısshiler belgili boldy.

Shteffı Graf tobynda álemniń 1-raketkasy, Belarýs ókili Arına Sobolenko sońǵy kezdesýinde amerıkalyq, reıtıngide 3-oryndaǵy Korı Gaýfty 7:6 (7:5), 6:2 esebimen utty.

Osylaısha, qatarynan úsh jeńiske qol jetkizgen A.Sobolenko Serena Ýılıams tobynda ekinshi oryn alǵan taǵy bir amerıkalyq, álemniń 4-raketkasy Amanda Anısımovamen kezdesetin boldy.

Buǵan deıin álemniń 6-raketkasy Elena Rybakına S.Ýılıams tobynda úsh oıynynda da jeńiske jetip, qazaqstandyq tennısshiler arasynda alǵash ret jartylaı fınalǵa joldama alǵan edi. Ol endi álemniń 5-raketkasy, amerıkalyq Djessıka Pegýlamen fınal joldamasyn sarapqa salady. D.Pegýla sońǵy matchynda reıtıngide 8-satydaǵy ıtalııalyq Jasmın Paolınıdi qapy qaldyrdy – 6:2, 6:3.

WTA qorytyndy týrnıriniń ótken jylǵy jeńimpazy K.Gaýff bıyl óz tobynda A.Sobolenko men D.Pegýlaǵa ese jiberip, toptyq básekeden asa almaı qaldy.

Eske sala keteıik, budan buryn WTA qorytyndy týrnırinde Elena Rybakınanyń úshinshi jeńisine qol jetkizgenin jazǵan edik.