WTA qorytyndy týrnıri: Elena Rybakına úshinshi jeńisine qol jetkizdi

ASTANA. KAZINFORM — Qazaqstannyń birinshi, álemniń 6-raketkasy Elena Rybakına Er-Rııad qalasynda (Saýd Arabııasy) ótip jatqan WTA qorytyndy týrnırinde óz tobyndaǵy sońǵy kezdesýin ótkizdi. 

Osyǵan deıin amerıkalyq Amanda Anısımova men Polsha ókili Iga Shventekti utqan qazaqstandyq tennısshi Serena Ýılıams tobynan jartylaı fınalǵa birinshi orynmen joldama alǵan edi. 

Elena Rybakına úshinshi básekesin álemniń 7-raketkasy, amerıkalyq Medıson Kızben ótkizýi kerek edi. Alaıda buǵan deıin eki oıynynda jeńilis tapqan M.Kız aýyryp qalýyna baılanysty matchtan bas tartty. Onyń ornyna kortqa álemniń 10-raketkasy, reseılik Ekaterına Aleksandrova shyqty.

Match 6:4, 6:4 esebimen qazaqstandyq sportshynyń paıdasyna sheshildi.

Bir saǵat 13 mınýtqa sozylǵan básekede Rybakına 8 eıspen birge 4 breık-poınttyń úsheýin paıdalandy. Aleksandrova 6 eıs, 1 breıkpen (6 breık-poınt) shekteldi.
Elena Rybakına jartylaı fınalda Shteffı Graf tobynda ekinshi oryn alǵan tennısshimen sheberlik baıqasady.

Eske sala keteıik, budan buryn WTA qorytyndy týrnırinde Elena Rybakınanyń jartylaı fınalǵa joldama alǵanyn jazǵan edik.