WTA qorytyndy týrnıri: Elena Rybakına fınalda álemniń 1-raketkasyn uta ala ma

ASTANA. KAZINFORM — Qazaqstannyń birinshi, álemniń 6-raketkasy Elena Rybakına búgin Er-Rııad qalasynda (Saýd Arabııasy) WTA qorytyndy týrnıriniń fınaldyq kezdesýin ótkizedi.

Qazaqstandyq tennısshiniń fınaldaǵy qarsylasy asa myqty – álemniń 1-raketkasy, Belarýs ókili Arına Sobolenko.

Qarsylastar osyǵan deıin 13 kezdesý ótkizip, sonyń segizinde Sobolenko jeńiske jetken.

2023 jyly Aýstralııa ashyq chempıonatynyń fınalynda A.Sobolenkonyń E.Rybakınany 4:6, 6:3, 6:4 esebimen utqany belgili.

Keıingi oıyndarǵa zer salsaq, bıyl Berlın týrnıriniń shırek fınalynda asa tartysty básekede qazaqstandyq tennısshi tórt matchbolyn paıdalana almaı, 6:7 (6:8), 6:3, 6:7 (6:8) esebimen ese jiberdi. Esesine Tsıntsınnatıde (AQSh) 6:1, 6:4 esebimen qarymta qaıyrdy. Al Ýhanda (Qytaı) jeńis Sobolenkonyń enshisinde ketti – 6:3, 6:3.

Er-Rııadtaǵy jyldyń qorytyndy týrnırinde Sobolenko da, Rybakına da tórt matchynyń bárinde jeńiske jetti.

Budan úsh jyl buryn A.Sobolenko fınalǵa deıin jetip, onda frantsııalyq Karolın Garsııaǵa jol bergen edi. Al E.Rybakına sońǵy básekege alǵash ret shyǵyp otyr. Demek, qos tennısshiniń bireýi chempıondyq ataqqa ıe bolmaq.

Oıyn Qazaqstan ýaqytymen saǵat 21.00-de bastalady.

Chempıon atanǵan tennısshi týrnırdegi barlyq jeńisiniń nátıjesimen 5,235 mln dollar (2,747 mlrd teńge) tabys tabady.

Eske sala keteıik, budan buryn Elena Rybakınanyń WTA qorytyndy týrnıriniń fınalyna shyqqanyn jazǵan edik.