WTA áıel tennısshiler úshin mindetti genderlik test engizdi
ASTANA. KAZINFORM – Áıelder tennısi qaýymdastyǵy (WTA) sportshylar úshin bıologııalyq jynysty anyqtaýǵa múmkindik beretin SRY genine mindetti genderlik testileý engizdi. Bul týraly Al Jazeera habarlady.
Test bir ret qana ótkiziledi jáne ony aýyz qýysynyń jaǵyndysyn alý nemese qan taldaýy arqyly tapsyrýǵa bolady.
Eger SRY genine júrgizilgen test oń nátıje kórsetse, sportshy qosymsha medıtsınalyq tekserýden ótedi. Bul gen aǵzanyń er adamǵa tán belgiler boıynsha damýyna baılanysty.
WTA-nyń 2024 jyly jańartylǵan burynǵy erejesine sáıkes, áıel genderlik sáıkestigin málimdegen jáne jarys bastalǵanǵa deıin keminde eki jyl boıy testosteron deńgeıin belgilengen shekten tómen ustap kelgen transgender áıelderdiń jarysqa qatysýyna ruqsat etiletin.
– Sportshylardy tekserý 2026 jyly bastalady. Protsess qupııalylyq pen derbes derekterdi qorǵaý talaptaryn saqtaı otyryp júrgiziledi. Sonymen qatar sportshylarmen túsindirý jumystary qatar uıymdastyrylady. WTA bul máseleniń kúrdeli ári sezimtal ekenin túsinedi jáne jańa saıasatty barlyq sportshynyń ar-namysy men qadir-qasıetin qurmetteı otyryp iske asyrady, – dedi uıym ókili.
Qazirgi ýaqytta WTA týrnırlerine qatysyp júrgen transgender áıel sportshylar joq ekeni atap ótildi.
Sońǵy jyldary osyndaı genetıkalyq testileýdi Dúnıejúzilik jeńil atletıka qaýymdastyǵy men Dúnıejúzilik boks federatsııasy sııaqty birqatar halyqaralyq sport uıymdary da engizgen.
Buǵan deıin Halyqaralyq Olımpıada komıteti Olımpıada oıyndaryndaǵy áıelder arasyndaǵy jarystarǵa bıologııalyq jynysy bir rettik test arqyly rastalǵan áıel sportshylar ǵana qatystyrylatynyn málimdegen bolatyn.
Osyǵan deıin FIFA-nyń álem chempıonatyna qatysatyn quramalar sanyn 64-ke deıin arttyrýdy qarastyrýy múmkin ekendigi týraly jazdyq.
