WSB jáne APB boks týrnırlerine áıelder qatysatyn bolady
ASTANA. QazAqparat - Búkilálemdik boks serııasyna (WSB) jáne AIBA Pro Boxing (APB) boks týrnırlerine áıelder qatysatyn bolady. Bul týraly búgin Astanada áıelder boksyn damytýǵa qatysty ótken baspasóz máslıhatynda Halyqaralyq Áýesqoı boks qaýymdastyǵynyń (AIBA) atqarýshy dırektory Karım Boýzıdı málim etti.
«AIBA komıssııasynyń Manchesterde ótken otyrysynda úlken jumys atqaryldy. Atap aıtqanda, WSB-ǵa kelesi jyldan bastap, áıelder de qatystyrylady. AIBA Pro Boxing-te áıelderdiń qatysýyna qatysty máseleni sheship jatyrmyz», - dedi ol.
Eske sala keteıik, Búkilálemdik boks serııasynda (WSB) Qazaqstan atynan «Astana Arlans» klýby óner kórsetýde. APB týrnırinde Berik Abdrahmanov pen Birjan Jaqypov Rıoda ótetin Olımpıadaǵa joldama utyp aldy.
