WSB serııasy: «Astana arlandary» kýbalyqtarmen kúsh synasady
ASTANA. 11 mamyr. QazAqparat - WSB serııasyndaǵy jekpe-jekterge Kýbanyń boksshylary qatysady. Bul týraly búgin Astanada ótken baspasóz máslıhatynda Halyqaralyq boks qaýymdastyǵynyń prezıdenti Chıng-Kýo Vý málim etti.
Onyń aıtýynsha, Astanada ótip jatqan WSB serııasynyń ekikúndik fınaly barysynda Halyqaralyq boks qaýymdastyǵynyń birqatar otyrystary ótti. «Osyndaıda biz ýaqytty tıimdi paıdalanyp, qajetti uıymdastyrýshylyq máselelerdi talqylap otyramyz. Máselen, WSB serııasyna Kýbany qabyldaý týraly sheshim qabyldandy», - dep atap kórsetti Chıng-Kýo Vý.
Aıta keteıik, búginde WSB serııasynyń úshinshi kezeńi ótýde. Endi, kelesi tórtinshi kezeńde biz kýbalyq boksshylardyń da ónerin tamashalaıtyn bolamyz. Olar «Astana arlandarymen» kezdesýi bek múmkin.
