WSB fınaly: Birinshi kúnniń qorytyndysy boıynsha «Astana arlandary» 3:2 esebimen alǵa shyqty
ASTANA. QazAqparat - Astanadaǵy «Dáýlet» sport kesheninde Dúnıejúzilik boks serııasy (WSB) boıynsha «Astana Arlandary» men «Kýba Domadores» arasyndaǵy fınaldyq jekpe-jektiń alǵashqy kúni keshe ótken bes kezdesýdiń qorytyndysynda «Astana arlandary» 3:2 esebimen alǵa shyqty.
Sharshy alańdaǵy alǵashqy kezdesýdiń shymyldyǵyn 49 keli salmaqtaǵy Temirtas Júsipov pen Ioanıs Oskar ashyp, jerlesimiz kýbalyqty bet qaratpaı utty. Sóıtip, aqtyq aıqastyń alǵashqy kezdesýin jeńispen bastaǵan «arlandar» birinshi kúnniń jalpy qorytyndysyn óz paıdasyna sheshe alǵan edi. Temirtastyń jeńisin komanda kapıtany Samat Báshenov pen jas «arlan» Meıirim Nursultan da qaıtalaǵan. Alaıda 56 keli salmaq dárejesindegi Qaırat Eralıev ákki kýbalyqtyń osal tusyn taba almasa, tóreshilerdiń sheshimimen 91 kelidegi qazaqstandyq boksshy Vasılıı Levıt Erıslandı Savon Kotılladan jeńilip qaldy.
Fınaldyq kezdesýdiń jekpe-jekteri búgin de Astanadaǵy «Dáýlet» sport kesheninde jalǵasady. Bul kúni taǵy bes salmaq dárejesi boıynsha Qazaqstan men bostandyq aralynyń bylǵary qolǵap sheberleri «kim myqtyny» anyqtaıdy. Kezdesýdiń ekinshi kúni sharshy alańǵa shyǵatyndar: 52 keli salmaq dárejesinde: Oljas Sáttibaev (Mıras Jaqypov) - Iosvanı Veıtıa Soto; 60 keli: Zákir Safıýllın (Erjan Musafırov) - Lasaro Horhe Alvares Estrada; 69 keli: Aslanbek Shymbergenov (Madııar Áshkeev) - Ronel Iglesıas Sotolongo; 81 keli: Nurdáýlet Jarmanov (Álı Ahmedov) - Hýlıo Sesar la Krýs Perasa; + 91 keli: Ivan Dychko (Fılıpp Hrgovıch) - Iohandı Toırak Ortega.
Eger eki kúndik kezdesýdiń qorytyndysy teń aıaqtalar bolsa, onda jeńimpaz komanda 56 keli salmaq dárejesinde ótetin qosymsha jekpe-jekte belgili bolmaq.
