WorldSkills Shanghai 2026: qazaqstandyq jastar jetistiktiń syryn aıtty

Halyqaralyq dodaǵa álemniń 70-ten astam elinen 1400-ge jýyq jas maman qatysqan. Qazaqstandyq jeńimpazdar jetistikke qalaı jetkenin Jibek Joly arnasyndaǵy «Búgin Live» baǵdarlamasynda aıtyp berdi.

Solardyń biri — grafıkalyq dızaın sheberi Baǵyjan Qoıshybaev. Onyń aıtýynsha, halyqaralyq jarys tórt kúnge sozylyp, bul baǵytta 29 eldiń ókili baq synaǵan.

— Sonyń ishinde Qazaqstan jaqsy nátıje kórsetti. Shyǵarmashylyq jolymda biregeı, este qalarlyq jáne fýnktsıonaldy dızaındar jasaýmen aınalysamyn. Mektep kezimnen bastalǵan qyzyǵýshylyǵym osy jetistikke jeteledi, — dedi Baǵyjan Qoıshybaev.

Al «Tsıfrlyq ınteraktıvti medıa dızaıny» quzyrettiliginde synǵa túsken Kamıla Álıeva «Best of Nation» marapatyna ıe boldy. Atalǵan baǵyt boıynsha segiz el saıysqa qatysyp, Qazaqstan besinshi orynǵa turaqtaǵan.

— Kásibı bilim berý men jas mamandardyń sheberligin arttyrýǵa arnalǵan jahandyq deńgeıdegi alańda jetistikke jetkenime qýanyshtymyn. Jarysqa 48 kún úzbeı daıyndalǵan edim, barlyǵy oıymnan shyqty. Bul — jumysshy mamandyqtaryn tańdaǵan jastar úshin múmkindik, — dedi Kamıla Álıeva.

Qazaqstandyqtardyń júldesi munymen shektelmeıdi. Chempıonatta taǵy birneshe jas maman kásibı sheberligin dáleldep, medal ıelendi. Atap aıtqanda, Aǵybaı Muhametjan «Veb-tehnologııalar», Nodırbek Rýstamhanov «Santehnıka jáne jylytý», Vadım Vıtkovskıı «Dánekerleý tehnologııalary», al Darıa Melnık «Ónerkásiptik dızaın» quzyrettilikteri boıynsha júldeger atandy. «Mehatronıka» baǵytynda Ramazan Nurlan men Denıs Panın komandalyq esepte medal enshiledi.

Jarystaǵy el úshin taǵy bir mańyzdy nátıje — jańa tehnologııalyq baǵyttaǵy júlde boldy. «Ushqyshsyz avıatsııalyq júıeler» quzyrettiligi álem chempıonatynyń baǵdarlamasyna alǵash ret engizilip, osy baǵytta Rýslan Nesterenko qola júlde enshiledi.

Eske salaıyq, Azııa oıyndarynyń búgingi kestesinde qazaqstandyq tórt boksshy sharshy alańǵa shyǵady.