WorldSkills Kazakhstan 2025 ulttyq chempıonatynyń jeńimpazdary marapattaldy
ASTANA. KAZINFORM — Jumysshy mamandyqtar jyly aıasynda Astanada ótken WorldSkills Kazakhstan 2025 ulttyq chempıonaty óz máresine jetti. Іs-shara barysynda tehnıkalyq jáne kásiptik bilim berý júıesiniń úzdik stýdentteri men jas mamandary marapattaldy.
Oqý-aǵartý mınıstrligi málimetinshe, Astana qalasynda qorytyndylanǵan respýblıkalyq WorldSkills Kazakhstan chempıonaty jas mamandardy, pedagogterdi, salalyq sarapshylardy jáne bıznes qaýymdastyqty biriktirgen mańyzdy alańǵa aınaldy.
Chempıonatqa elimizdiń barlyq óńirinen 800-den astam kolledj stýdenti qatysty. Bıylǵy chempıonat kolledj stýdentteri arasyndaǵy básekelestikti kúsheıtip, olardyń kásibı daıarlyǵyn jańa sapalyq deńgeıge kóterdi.
– WorldSkills Kazakhstan – elimizdegi kásibı bilim sapasynyń negizgi ındıkatory jáne daǵdylar men quzyrettilikterdiń basty sheberlik alańy. Bıyl chempıonat 45 quzyrettilik boıynsha ótti. Biz kolledj stýdentteriniń kásibı daıarlyǵynyń artqanynyń kýási boldyq. Jyl saıyn qatysýshylar men quzyrettilik sanynyń artýy bil kásibı sheberlik dodasyna qyzyǵýshylyqtyń artqanyn kórsetedi. Bıyl qatysýshylar sany 1,5 ese ósti. Bul chempıonatta biz jas mamandardyń shynaıy sheberligin, eńbeksúıgishtigin jáne kásibı batyldyǵyn kórdik. Bul chempıonat jas mamandarǵa serpin men senim beredi, – dedi Shynar Aqparova.
Chempıonat qorytyndysy boıynsha jalpy medaldar sany 53 altyn, 55 kúmis, 59 qola medaldy, sondaı-aq 213 «Erekshelik» medalondaryn qurady.
Jalpykomandalyq esepte Almaty qalasy 60 balmen birinshi orynǵa shyqty. Pavlodar jáne Aqmola oblystary 56 balmen ekinshi oryndy bólisti.
Al Túrkistan men Qaraǵandy oblystary – 55 balmen úshinshi orynǵa turaqtady.
2025 jylǵy chempıonattyń basty jańalyǵy – eńbek naryǵyndaǵy suranys pen tehnologııalyq trendterge saı 15 jańa quzyrettiliktiń engizilýi boldy.
X Respýblıkalyq chempıonattyń jeńimpazdary Qazaqstannyń ulttyq quramyna qosylyp, 2026 jyly Qytaıda ótetin WorldSkills International chempıonatynda el namysyn qorǵaıdy.
Aıta keteıik, Chempıonat Oqý-aǵartý mınıstrliginiń qoldaýymen jáne «Talap» KeAQ uıymdastyrýymen ótkizildi.
