World Tennis: Halyqaralyq tennıs federatsııasynyń ataýy ózgerdi
ASTANA. KAZINFORM — 1913 jyldan beri tennıstiń álemdik basqarýshy organy bolyp kelgen Halyqaralyq tennıs federatsııasy (ITF) óziniń ataýy men brendin resmı túrde ózgertetinin jarııalady.
Qazaqstan tennıs federatsııasynan málim etkenindeı, endi uıym World Tennis dep atalady. Rebrendıng uıymnyń jańa damý kezeńiniń bastalǵanyn bildiredi. Bul barlyq jastaǵy ári ár túrli daıyndyq deńgeıindegi adamdarǵa jańa múmkindikter usynýǵa baǵyttalǵan uzaq merzimdi strategııanyń bir bóligi bolyp sanalady.
World Tennis prezıdenti Devıd Haggertı jańa ataý uıymnyń jahandyq mıssııasyn jáne búkil álemde tennıstiń turaqty damýyn qamtamasyz etýge degen umtylysyn aıqyn kórsetetinin atap ótti.
— Búgin biz álemdik tennıstegi rólimizdi qaıta paıymdap, osy tamasha sport túriniń berik ári turaqty bolashaǵyn qamtamasyz etýge degen adaldyǵymyzdy taǵy bir márte kórsetý múmkindigine ıe bolyp otyrmyz. World Tennis bizdiń kim ekenimizdi, jahandyq aýqymymyzdy jáne biregeı mıssııamyzdy bildiredi. Bizdiń maqsatymyz — 214 ulttyq qaýymdastyqpen jáne tennıs qaýymdastyǵynyń barlyq ókilderimen birlese otyryp, álemniń túkpir-túkpirinde tennısti damytý. Bul osy sport túriniń buqaralylyǵyn arttyryp, bolashaq juldyzdardyń qalyptasý jolyn odan ári jetildirýdi jáne jasyna, jynysyna nemese shyqqan tegine qaramastan, barshanyń tennıske qoljetimdiligin keńeıtýdi kózdeıdi, — dedi D. Haggertı.
Jańa strategııa aıasynda World Tennis qyzmetiniń bes negizgi baǵytyn aıqyndady. Atap aıtqanda, tennıspen aınalysatyn adamdar sanyn arttyrý, bolashaq juldyzdardy daıarlaý júıesin damytý, ulttyq quramalar arasyndaǵy komandalyq týrnırlerdi nyǵaıtý, ınnovatsııalardy engizý jáne sporttyń turaqty damýyn qamtamasyz etý, álemdik tennıske qosymsha ınvestıtsııalar tartý.
Sonymen qatar uıym jyl saıynǵy kirisiniń keminde 85 paıyzyn 214 ulttyq qaýymdastyq arqyly tennısti damytýǵa qaıta ınvestıtsııalaýdy josparlap otyr.
Budan bólek, World Tennis 2035 jylǵa qaraı álemde tennıs oınaıtyn adamdar sanyn 106 mıllıonnan 140 mıllıonǵa deıin jetkizýdi maqsat etip otyr. Bul kórsetkishtiń 30 paıyzdan astamǵa ósetinin bildiredi.
Eske sala keteıik, budan buryn Jibek Qulambaevanyń Polshadaǵy jarystyń jartylaı fınalyna ótkenin jazǵan edik.
