World Press Photo-2020 syılyǵynyń jeńimpazdary anyqtaldy
LONDON. QazAqparat – World Press Photo-2020 bedeldi halyqaralyq fotojýrnalıster konkýrsynyń jeńimpazdarynyń esimi jarııalandy, dep habarlaıdy QazAqparat BBC-ge silteme jasap.
Basty nomınatsııada – «Jyldyń úzdik sýreti» boıynsha «Tikeleı daýys» atty sýret jeńdi. Sýretti AFP agenttiginiń fotografy ıAsýesı Tıba (Yasuyoshi Chiba) túsirgen. Sýrette 2019 jyly jazda Sýdanda jas jigit narazylyq óleńin oqyp jatyr, al narazylyqqa shyqqandar ony telefondaryna túsirip tur.
Qazylar múshesi Tıbanyń sýreti jastyq shaq pen ónerdi kórsetti dep málim etti.
Sýretshi: «bul sát osy elde júrgen kezde maǵan kezdesken jalǵyz beıbit narazylyq boldy. Men olardyń jeńilmeıtin yntymaqtastyǵyn sezindim», - deıdi.
Qazylar alqasynyń tóraǵasy Lekgeto Makolanyń (Lekgetho Makola) aıtýynsha, sýret shıelenis kezinde túsirilse de, adamdardy shabyttandyratyn kúshke ıe.
«Biz eshkimge oq atpaı, tas laqtyrmaı óleń oqyp turǵan jas jigitti kórdik», - dedi ol.
Sondaı-aq, úzdik sýretter tizimine bes týyndy kirdi.
2019 jyly 10 naýryzda Efıopııa áýe jelileriniń (Ethiopian Airlines ) ET302 borty Addıs-Abeb áýejaıynan ushqannan keıin apatqa ushyraıdy. Saldarynan 157 adam qaza tabady. Sýrette Boeing-737 áýe apaty qurbanynyń týysy oqıǵa ornyna betine balshyq jaqqan. Sýretti Mýlýgeta Aıene (Mulugeta Ayene) túsirip alǵan.
Aljır. Úkimetke qarsy kóterilis kezinde stýdentterdiń polıtseılermen qaqtyǵysy. Sýretti Farýk Batıche (Farouk Batiche) túsirgen.
Jandaný. Sýret: Tomek Kachor (Tomek Kaczor).
Bul sýrette 15 jastaǵy Eva esimdi armıan qyzy beınelengen. Ol sol sátte katatonıkalyq jaǵdaıdan shyqqan. Sýret ótken jyly maýsymda Polshanyń Podkova Lesn qalasynda bosqyndardy qabyldaý ortalyǵynda túsirilgen.
Boıjetken jaralanǵan jaýyngerdiń halin bilýge keldi. Sýret: Aıvor Prıkett (Ivor Prickett)
Sırııa demokratııalyq kúshiniń 18 jastaǵy jaýyngeri Ahmed Ibragım ótken jyldyń 20 qazanynda Hassaktaǵy aýrýhanada túsirip alynǵan. Ol túrik áskerimen qaqtyǵys kezinde qatty kúıip qalǵan. Alǵashqyda boıjetken bólmege kirýge qoryqqan, sebebi onyń jaraqatynan qatty shoshyǵan. Biraq, medbıke onyń kirip, Ahmedtiń qolynan ustap, sóılesýine kóndirgen.
Artyq eshteńe joq. Sýret: Nıkıta Tereshın
Nıkıta Tereshın ótken jyly aqpanda Abý-Dabıde Halyqaralyq qorǵanys kórmesi aıaqtalǵannan keıin (Idex) tankke qarsy granatometterdi jınap júrgen kásipkerdi sýretke túsirgen.
