World of Trade 2018: Taýar ótkizýdiń tyń joldary qandaı
ASTANA. QazAqparat - Astanada "World of Trade 2018" halyqaralyq konventtiń jumysy bastaldy. Oǵan saýdagerler, taýar óndirýshileri men rıteılerler keldi. Negizgi maqsat - saýda-sattyqtyń tyń joldaryn anyqtaý, dep xabarlaıdy QazAqparat tilshisi.
Zertteýge sáıkes, búginde saýdanyń klassıkalyq úlgisi eskirdi. Máselen, saýda ortalyqtaryna keletin tutynýshylar bir nárseni alý úshin emes, kóp jaǵdaıda kóńil kóterý úshin keledi. Watcom Group kompanııasynyń málimeti boıynsha xalyqtyń 65 protsenti saýda ortalyǵyna tek ýaqyt ótkizý úshin ǵana barady. Osyǵan baılanysty taýar ótkizýdiń tyń joldaryn izdeý kerek. "World of Trade 2018" xalyqaralyq konventi aıasynda qatysýshylar atalǵan máselelerdiń bárin keńinen talqylaýdy kózdeıdi.
"Máselen, kúni keshe ǵana men bir saýda jelisiniń ókilderimen kezdestim. Olar aıtady, búginde saýda ortalyqtarynyń basty básekelesi ózderi sııaqty dúkender ǵana emes. Taýardy úıge jetkizetin qyzmetter de qatty jumys isteı bastady. Tutynýshylardyń psıxologııasy da ózgerdi. Úıde otyrǵan qyz-kelinshekter burynǵydaı saýda ortalyqtaryn aralamaıdy, sóreden taýar izdemeıdi. Olar ǵalamtordan tapsyrys berip, úıge aldyrta salady. Sondyqtan búginde "tutynýshy keledi-aý" dep, otyra berýge bolmaıdy. Taýar ótkizýdiń tyń joldaryn izdeýimiz kerek", - deıdi Support Partners jetekshisi Konstantın Borısov.
Uıymdastyrýshylardyń aqparaty boıynsha World of Trade 2018-ge segiz memleket - Qazaqstan, Reseı, Ózbekstan, Qyrǵyzstan, Túrikmenstan, Ázerbaıjan, Ýkraına men Armenııadan 100-den astam saýda jelisi qatysýǵa nıet bildirdi. Ekikúndik shara barysynda qatysýshylar onlaın saýdany uıymdastyrý, memlekettik retteý, jeke saýda markasyn qalyptastyrý jáne taǵy basqa mańyzdy máselelerdi talqylaıdy. Jospar boıynsha úsh birdeı kongress uıymdastyrylady. Ol jıyndar eýrazııalyq saýda, rıteıl tájirıbesi men qazaqstandyq eksportaýshy kúnine arnalady. Konvent qorytyndysy boıynsha 500-den astam kelisimshartqa qol qoıylady degen jospar bar.
