World of Tanks oıynyn shyǵarýshy ekstremıster tizimine engizilýi múmkin

ASTANA. KAZINFORM – Sot «Lesta» kompanııasynyń qyzmetine tyıym saldy. Bul beıneoıyn shyǵarýshyny ekstremıster men lańkester tizilimine engizýge negiz boldy, dep habarlaıdy TASS aqparat agenttigi.

Máskeýdiń Taganskıı aýdandyq soty «Tankter álemi» jáne «Kemeler álemi» kompıýterlik oıyndaryn shyǵarýshy «Lesta» kompanııasynyń qyzmetine tyıym salyp, onyń aktıvterin Reseıdiń paıdasyna aınaldyrdy. Bul beıneoıyn shyǵarýshymen baılanysty sot sheshimine qatysty alǵashqy oqıǵa, dep jazdy TASS. 

«Lesta» — postkeńestik Reseıdegi eń kóne beınestýdııa. 2011 jyly uıym World of Tanks jáne World of Battleships oıyndaryn jasap shyǵarý úshin Wargaming-pen birikti. Alaıda 2022 jyly bul eki kompanııa bólinip ketti.

Wargaming Ýkraınany, al «Lesta» Reseıdi qoldaıtynyn jarııalady. Osyǵan baılanysty «Lesta» oıyndaryn reseılik serverlerde shyǵara bastady.

Buǵan deıin Bas prokýratýra Reseı múddesi úshin kompanııa ıeleri Vıktor Kıslyı men Málik Hatajaevqa, sondaı-aq «Lesta» JShS men «Lesta geıms edjensı» JShS Ýkraına qarýly kúshterine qoldaý kórsetý túrindegi ekstremıstik áreketine baılanysty osy birlestikterdiń qyzmetine tyıym salý týraly talap-aryz bergen bolatyn.

Bas prokýratýranyń talaptary kompanııanyń gonkongtyq offshoryna baılanysty boldy, odan Ýkraına qarýly kúshteriniń qajettilikteri úshin qarajat aýdarylǵan, dep naqtylady quqyq qorǵaý organdary TASS agenttigine.

Osyǵan deıin Astana men Pavlodarda ekstremızmge qatysy bar kúdiktiler ustalǵany týraly jazdyq.