World Boxing: Tórehan Sabyrhan bokstan álem chempıonatynda ekinshi jeńisine jetti

ASTANA. KAZINFORM — Anglııanyń Lıverpýl qalasynda World Boxing aıasynda ótip jatqan álem chempıonatynda búgin, 8 qyrkúıekte Qazaqstan quramasynan Tórehan Sabyrhan (70 keli) ¼ fınalǵa shyqty.

Otandasymyz 1/8 fınalda nıderlandtyq Fınn Robert Bospen sharshy alańǵa shyqty. Jekpe-jek asa tartysty ótti. Birinshi raýndta nıderlandtyq boksshy jeńse, odan keıin Tórehan basymdyǵyn kórsetti. Sheshýshi raýndta eki boksshy da belsendilik tanytty. Qorytyndy nátıjede tóreshiler Tórehannyń jeńisine qoldaý bildirdi.

Tórehan Sabyrhan 2006 jyly dúnıege kelgen. Qazirge deıin ol jastar arasynda álem chempıony (2024), jastar men jasóspirimder arasynda Azııanyń tórt dúrkin chempıony bolǵan.

Sondaı-aq 2025 jylǵy Strandja kýbogynyń jeńimpazy atandy.

Tórehan álem chempıonatynda budan buryn aljırlik Esýf ıAıcheni qapy qaldyrdy. 

Aıta ketsek, budan buryn el quramasynan Gúlsaıa Erjan (80 keli) 1/8 fınalda lıtvalyq Iveta Lesınskıteni jeńip, jarysty jalǵastyrýǵa múmkindik aldy.

Endi el quramasynan búgin Beıbarys Jeksen (60 keli), Sabyrjan Aqqalyqov (75 keli), Saǵyndyq Toǵambaı (90 keli), Aıbek Oralbaı (90 keliden joǵary), Aıda Ábikeeva (65 keli) sharshy alańǵa shyǵady.

Dúbirli doda 4-14 qyrkúıek aralyǵynda Anglııanyń Lıverpýl qalasynda ótkiziledi. Jekpe-jekter «Qazaqstan» jáne «Qazsport» telearnalarynan tikeleı efırde kórsetiledi.

Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde saıysqa túsedi. Al 12-13 qyrkúıekte jartylaı bolsa, 13-14 qyrkúıekte fınaldyq básekeler ótedi.