World Boxing: Rasýl Asanhanov 19 jasqa deıingiler arasynda Azııa chempıony atandy

ASTANA. KAZINFORM - Qazaqstandyq Rasýl Asanhanov (90 keli) World Boxing aıasynda Taıland astanasy Bangkok qalasynda 19 jasqa deıingi uldar arasynda ótken Azııa chempıony atandy.

Otandasymyz fınalda úndistandyq Hemant Sangvanmen qolǵap túıistirdi. Ol qarsylasyn ekinshi raýndta nokdaýnǵa jiberdi. Osylaısha qazaqstandyq boksshy Azııa chempıony ataǵyn jeńip aldy.

Qurlyqtyq doda fınalynda Ádilet Tortýbek (60 keli), Bıbarys Áshirbaı (70 keli), Tımýr Taıbekov (80 keli), Nursultan Qystaýbaı (85 keli) kúmis júlde aldy.

Aıta ketsek, budan buryn 19 jasqa deıingi qyzdar arasynda el quramasynan Quralaı Eginbaıqyzy (80 keli) Azııa chempıony ataǵyn jeńip aldy.

Al Aıajan Ermek (57 keli) kúmis júldeger atansa, Aıym Tańqybaeva (51 keli), Janel Imantaeva (54 keli), Alına Kudaıgenova (60 keli), Aqbota Esimbekova (65 keli) jáne Sabına Jaqsylyq (80 keliden joǵary) úzdik úshtikti túıindedi.

Endi 22 jasqa deıingiler arasyndaǵy fınal 12 tamyz kúni bolady. 

Qurlyqtyq doda 30 shilde-12 tamyz aralyǵyna belgilengen. Oǵan 25 elden 396 boksshy (237 er jáne 159 áıel) qatysady dep josparlanyp otyr.

Olardyń arasynda Qazaqstan, Aýǵanstan, Fılıppın, Gonkong, Úndistan, Indonezııa, Iran, Irak, Japonııa, Ońtústik Koreıa, Saýd Arabııasy, Qyrǵyzstan, Malaızııa, Mońǵolııa, Nepal, Qatar, Qytaı, Sıngapýr, Shrı-Lanka, Taıland, Túrkimenstan, Ózbekstan, BAÁ, Vetnam, Býtan bar.