World Boxing Qazaqstannyń halyqaralyq sporttyq is-sharalardy uıymdastyrý deńgeıin joǵary baǵalady
ASTANA. KAZINFORM - Týrızm jáne sport mınıstri Erbol Myrzabosynov Qazaqstan boks federatsııasynyń prezıdenti Shahmurat Mútálippen birge 2027 jylǵy bokstan álem chempıonatyna daıyndyq barysyn ınspektsııalaý maqsatynda Astanaǵa kelgen World Boxing halyqaralyq uıymynyń ókilderimen kezdesti.
Týrızm jáne sport mınıstrligi baspasóz qyzmetiniń habarlaýynsha, jıynǵa World Boxing uıymynyń bas hatshysy Tommı Rene Jozefın Dılen, Olımpıada chempıony Serik Sápıev, sondaı-aq uıym men mınıstrlik ókilderi qatysty.
Erbol Myrzabosynov Qazaqstannyń World Boxing uıymymen yntymaqtastyǵynyń mańyzyn atap ótip, álem chempıonatyn ótkizý otandyq sport úshin mańyzdy oqıǵa ekenin aıtty.
-Qazaqstan Prezıdenti Qasym-Jomart Toqaev bokstyń elimizdegi tanymal sport túrleriniń biri retindegi aıryqsha rólin birneshe ret atap ótti. Astanada álem chempıonatyn ótkizý otandyq boksty damytýǵa, halyqaralyq sporttyq baılanysty nyǵaıtýǵa jáne jastar arasynda sportty nasıhattaýǵa úlken serpin beredi, – dedi mınıstr.
Kezdesý barysynda taraptar 2027 jylǵy álem chempıonatyna daıyndyq, sporttyq ınfraqurylym, arenalardyń daıyndyǵy jáne Qazaqstan men World Boxing arasyndaǵy yntymaqtastyq máselelerin talqylady.
World Boxing ókilderi álem birinshiliginiń daıyndyq josparymen tanysyp, Qazaqstanda halyqaralyq sporttyq is-sharalardy uıymdastyrý deńgeıine joǵary baǵa berdi.
Eske sala keteıik, World Boxing uıymdastyratyn álem chempıonaty 2027 jyldyń sáýir aıynda Astanada ótedi.
Osyǵan deıin Erbol Myrzabosynov áıgili boksshy Roı Djonspen kezdesken bolatyn.
