World Boxing: qazaqstandyq eki boksshy álem chempıonaty fınalyna ótti
ASTANA. KAZINFORM - AQSh-tyń Pýeblo qalasynda World Boxing federatsııasy aıasynda ótip jatqan bokstan 19 jasqa deıingi jastar arasyndaǵy álem chempıonatynda qazaqstandyq eki boksshy fınalǵa shyqty.
El quramasynan jartylaı fınalda Asylhan Kósherbaı (65 keli) men Danııal Raıymbekov (85 keli) jeńiske jetip, aqtyq saıysqa joldama aldy.
Endi fınalda Asylhan aýstralııalyq Kýper MakKonellmen sharshy alańǵa shyqsa, Danııal ýelstik Denıel Pıttpen kezdesedi.
World Boxing uıymynyń birinshiligine el quramasy tórt sportshymen kelgen edi. Olardyń arasynan Erasyl Amanǵalıev (55 keli) pen Dıas Serikuly (70 keli) jarys jolyn erte aıaqtaýǵa májbúr boldy.
Aıta ketsek, bıyl Qazaqstan boks federatsııasy uzaq talqylaýlar men saraptamanyń nátıjesinde mańyzdy sheshim qabyldady. Qazaqstan World Boxing uıymynyń qataryna qosylý úshin resmı ótinish berdi. Bul sheshim birinshi kezekte otandyq boksshylardyń Olımpıadadaǵy bolashaǵymen tikeleı baılanysty bolyp otyr.
Álem chempıonaty 2 qarashaǵa deıin jalǵasady.
Eske salsaq, Qazaqstan Ulttyq olımpıadalyq komıtetiniń prezıdenti Gennadıı Golovkın World Boxing uıymy ótkizip otyrǵan tuńǵysh álem chempıonatynyń ashylýyna qatysty.
