World Boxing: Gúlsaıa Erjan bokstan álem chempıonatynda ¼ fınalǵa ótti

ASTANA. KAZINFORM — Anglııanyń Lıverpýl qalasynda World Boxing aıasynda ótip jatqan álem chempıonatynda búgin, 8 qyrkúıekte Qazaqstan quramasynan Gúlsaıa Erjan (80 keli) 1/4 fınalǵa shyqty.

Otandasymyz 1/8 fınalda lıtvalyq Iveta Lesınskıtemen qolǵap túıistirdi.

Jekpe-jek tartysty ótti. Qarsylastar bir-birine kóbirek soqqy jumsaýǵa tyrysty. Nátıjesinde tóreshiler Gúlsaıanyń jeńiske jetkenine qoldaý bildirdi. Ol shırek fınalǵa joldama aldy.

Gúlsaıa Erjan Qyzylorda oblysy Qazaly topyraǵynda dúnıege kelgen. 2022 jyly qurlyqtyq dodada jeńimpaz atandy. Al Serbııada ótken halyqaralyq týrnırde kúmis medal aldy.

2024 jyly ol Azııa chempıony ataǵyn jeńip aldy.

Endi el quramasynan búgin Beıbarys Jeksen (60 keli), Tórehan Sabyrhan (70 keli), Sabyrjan Aqqalyqov (75 keli), Saǵyndyq Toǵambaı (90 keli), Aıbek Oralbaı (90 keliden joǵary), Aıda Ábikeeva (65 keli) sharshy alańǵa shyǵady. 

Dúbirli doda 4-14 qyrkúıek aralyǵynda Anglııanyń Lıverpýl qalasynda ótkiziledi. Jekpe-jekter «Qazaqstan» jáne «Qazsport» telearnalarynan tikeleı efırde kórsetiledi.

Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde saıysqa túsedi. Al 12-13 qyrkúıekte jartylaı bolsa, 13-14 qyrkúıekte fınaldyq básekeler ótedi.