World Boxing: Elına Bazarova bokstan álem chempıonatyn aıaqtady

ASTANA. KAZINFORM — World Boxing aıasynda Anglııanyń Lıverpýl qalasynda ótetin álem chempıonatynda búgin, 4 qyrkúıekte Qazaqstan quramasynan Elına Bazarova (54 keli) sharshy alańǵa shyqty.

Otandasymyz ózbekstandyq Nıgına Ýktamovamen kezdesti. Alǵashqy eki raýnd ózbek boksshysynyń basymdyǵymen aıaqtaldy. Nátıjesinde jalpy qorytyndy boıynsha jeńis Nıgına Ýktamovaǵa berildi.

Eldos Saıdalın bastaǵan bapkerler áıelder quramasynda tómendegi bylǵary qolǵap sheberlerine senim artty. 

Aldaǵy álem chempıonatynda elimizdiń atynan Elınadan ózge Nazym Qyzaıbaı (48 keli), Alýa Balqybekova (51 keli), Karına Ibragımova (57 keli), Vıktorııa Grafeeva (60 keli), Aıda Ábikeeva (65 keli), Natalıa Bogdanova (70 keli), Nadejda Rıabets (75 keli), Gúlsaıa Erjan (80 keli) jáne Eldana Talıpova (80 keliden joǵary) synǵa túsedi.

World Boxing uıymynyń aıasynda alǵash ret Lıverpýl (Anglııa) qalasynda ótetin álem chempıonatyna 68 elden barlyǵy 554 (erler — 329, áıelder — 225) keldi.

Dúbirli doda 4-14 qyrkúıek aralyǵynda Anglııanyń Lıverpýl qalasynda ótkiziledi. Jekpe-jekter «Qazaqstan» jáne «Qazsport» telearnalarynan tikeleı efırde kórsetiledi.

Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde saıysqa túsedi. Al 12-13 qyrkúıekte jartylaı bolsa, 13-14 qyrkúıekte fınaldyq básekeler ótedi.

Budan buryn World Boxing aıasynda Anglııanyń Lıverpýl qalasynda ótetin álem chempıonatynynda Qazaqstan boksshylary alǵashqy jekpe-jegin qashan ótkizetini anyqtaldy.