World Boxing: Bokstan álem chempıonatynyń jarys kestesi belgili boldy

ASTANA. KAZINFORM - World Boxing aıasynda Anglııanyń Lıverpýl qalasynda ótetin bokstan álem chempıonatynyń jarys kestesi belgili boldy.

Dúbirli doda 4-14 qyrkúıek aralyǵynda Anglııanyń Lıverpýl qalasynda ótkiziledi. 

Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde saıysqa túsedi. Al 12-13 qyrkúıekte jartylaı bolsa, 13-14 qyrkúıekte fınaldyq básekeler ótedi.

Eldos Saıdalın bastaǵan bapkerler áıelder quramasynda tómendegi bylǵary qolǵap sheberlerine senim artty. Aldaǵy álem chempıonatynda elimizdiń atynan Nazym Qyzaıbaı (48 keli), Alýa Balqybekova (51 keli), Elına Bazarova (54 keli), Karına Ibragımova (57 keli), Vıktorııa Grafeeva (60 keli), Aıda Ábikeeva (65 keli), Natalıa Bogdanova (70 keli), Nadejda Rıabets (75 keli), Gúlsaıa Erjan (80 keli) jáne Eldana Talıpova (80 keliden joǵary) synǵa túsedi.

Al elimizdiń erler quramasynyń bas bapkeri Qaırat Sátjanov negizinen tájirıbeli boksshylarǵa senim artyp otyr. Olardyń qatarynda Sanjar Táshkenbaı (50 keli), Mahmud Sabyrhan (55 keli), Beıbarys Jeksen (60 keli), Ertýǵan Zeınýlınov (65 keli), Tórehan Sabyrhan (70 keli), Sabyrjan Aqqalyqov (75 keli), Nurbek Oralbaı (80 keli), Bekzat Nurdáýletov (85 keli), Saǵyndyq Toǵambaı (90 keli) men Aıbek Oralbaı (90 keliden joǵary) bar.