World Boxing: Azııa chempıonatynda qazaqstandyq eki boksshy kúmis aldy

ASTANA. KAZINFORM - World Boxing aıasynda Taıland astanasy Bangkok qalasynda 19 jasqa deıingi uldar arasynda ótip jatqan Azııa chempıonatynda Qazaqstan quramasy eki kúmis medal aldy.

Qurlyqtyq doda fınalynda Ádilet Tortýbek (60 keli) ırandyq Alı Chıgrıhanıge 2:3 esebimen jol berdi.

Al Bıbarys Áshirbaı (70 keli) ózbekstandyq Abdýlazız Jýrakýlovqa ese jiberdi.

Endi otandastarymyz arasynan Tımýr Taıbekov (80 keli) ózbekstandyq Norbek Abdýllaev, Nursultan Qystaýbaı (85 keli) ózbekstandyq Samır Sobırov, Rasýl Asanhanov (90 keli) úndistandyq Hemant Sangvanmen qolǵap túıistiredi.

Aıta ketsek, budan buryn 19 jasqa deıingi qyzdar arasynda el quramasynan Quralaı Eginbaıqyzy (80 keli) Azııa chempıony ataǵyn jeńip aldy.

Al Aıajan Ermek (57 keli) kúmis júldeger atansa, Aıym Tańqybaeva (51 keli), Janel Imantaeva (54 keli), Alına Kudaıgenova (60 keli), Aqbota Esimbekova (65 keli) jáne Sabına Jaqsylyq (80 keliden joǵary) úzdik úshtikti túıindedi.

Qurlyqtyq doda 30 shilde-12 tamyz aralyǵyna belgilengen. Oǵan 25 elden 396 boksshy (237 er jáne 159 áıel) qatysady dep josparlanyp otyr.