World Boxing: Azııa chempıonatynda Aıym Tańqybaeva jartylaı fınalǵa shyqty

ASTANA. KAZINFORM - World Boxing aıasynda Taıland astanasy Bangkok qalasynda 19 deıingiler arasynda bokstan 2025 jylǵy Azııa chempıonatynda 5 tamyzda Aıym Tańqybaeva (51 keli) jartylaı fınalǵa joldama aldy.

Qazaqstandyq bylǵary qolǵap sheberi shırek fınalda Mońǵolııa ókili Sývd-Erdene Baıanmýnhpen qolǵap túıistirdi. Tóreshilerdiń biraýyzdan sheshimimen jeńis Aıymǵa berildi.

Al Dıana Serikbaeva (48 keli) shırek fınalda japonııalyq Momoko Hasebeıen sheberlik baıqasty. Degenmen ol qarsylasyna tótep bere alǵan joq. Saldarynan qarsylasyna ese jiberip, jarysty erte aıaqtady.

Aıta ketsek, búgin endi el quramasynan alty boksshy synǵa túsedi. Kúndizgi sessııada 12 jupta Janel Imantaeva (54 keli) Ońtústik Koreıa ókili Djıe Kım, 13 jupta Aıajan Ermek (57 keli) taılandtyq Chavalýk Sonným, 18 jupta Alına Kýdaıgenova (60 keli) Ońtústik Koreıa sportshysy Djıhe Honmen sharshy alańǵa shyǵady.

Sondaı-aq keshki sessııada 2 jupta Aqbota Esimbekova (65 keli) qyrǵyzstandyq Aıperı Adylbekova, 7 jupta Marııa Sıdorenko (70 keli) qytaılyq Almıra Abdýraım, 9 jupta Zarına Tolybaı (75 keli) úndistandyq Aartı Kýmarımen kezdesedi.

Qurlyqtyq doda 30 shilde-12 tamyz aralyǵyna belgilengen. Oǵan 25 elden 396 boksshy (237 er jáne 159 áıel) qatysady dep josparlanyp otyr. Olardyń arasynda Qazaqstan, Aýǵanstan, Fılıppın, Gonkong, Úndistan, Indonezııa, Iran, Irak, Japonııa, Ońtústik Koreıa, Saýd Arabııasy, Qyrǵyzstan, Malaızııa, Mońǵolııa, Nepal, Qatar, Qytaı, Sıngapýr, Shrı-Lanka, Taıland, Túrikmenstan, Ózbekstan, BAÁ, Vetnam, Býtan bar.