Wolt Ózbekstan men Japonııadaǵy qyzmetin toqtatty
ASTANA. KAZINFORM – Wolt óziniń qyzmetin eki naryqta toqtatqanyn málimdedi. Osyndaı habar atalǵyn qyzmettiń mobıldi qosymshasynda paıda boldy.
2026 jylǵy 5 naýryzdan bastap Ózbekstanda Wolt qosymshasy nemese onyń resmı saıty arqyly tapsyrys berýge bolmaıdy. Kompanııa sheshimniń túpkilikti ekenin jáne el aýmaǵynda qyzmet tolyq toqtaıtynyn málimdedi.
- Ózbekstandaǵy naryq sharttarynyń ereksheligine baılanysty biz qyzmet deńgeıin ózimizdiń talaptarymyzǵa saı ustap tura almaımyz degen baılamǵa keldik,-delingen Wolt kompanııasy Gazeta.uz-daǵy habarlamasynda.
2014 jyldan beri jumys isteıtin jáne 30-dan astam elde qyzmet kórsetetin kompanııa jabylý týraly sheshim qıynǵa soqqanyn aıtady.
Wolt bul sheshimniń paıdalanýshylar úshin yńǵaısyzdyqtar týdyrýy múmkin ekenin túsinetinin aıta kele, servıske jumys istegen jyldary kórsetken senim men qoldaýlary úshin alǵys aıtty. Sonymen birge klıentterge qyzmettiń jabylý sebepteri men keıingi áreketter túsindirilgen FAQ bólimimen tanysý usynyldy.
Sonymen qatar, Wolt-tyń bas atqarýshy dırektory Natalıa Hızanıshvılı LinkedIn paraqshasynda Japonııadaǵy fılıaldyń da jabylatynyn habarlady.
Onyń aıtýynsha, Wolt Japonııadaǵy qyzmetin halyqaralyq deńgeıdegi aýqymdy strategııalyq qaıta qaraý aıasynda toqtatady. Sheshim qıyn bolǵany aıtyldy.
- Biz búgin bıznesimizdi halyqaralyq deńgeıde búgingiden keń aýqymdy strategııalyq turǵyda qaıta qaraý aıasynda Wolt-tyń Japonııadaǵy qyzmetin toqtatatynyn málimdedik. Bul árıne, ońaı bolǵan joq. Degenmen ol bizdiń komandamyzdyń keıingi jyldary atqarǵan orasan zor jumysynyń aınasy deýge bolady. Men satýshy, klıent, seriktes sııaqty Wolt Japan qyzmetin jolǵa qoıýǵa úles qosqan komandamyzdyń árbir múshesine alǵys aıtamyn. Keıngi eki jylda osy bıznesti basqarǵan men úshin de bul úlken mártebe. Biz ózimiz maqtan ete alatyn dúnıeni jasaı aldyq, - delingen habarlamada.
Osyǵan deıin YouTube servısteriniń jumysynan taǵy da aqaý shyqqany týraly jazdyq.