Wildberries-tiń Almatyda salynyp jatqan logıstıkalyq ortalyǵyna qatysty qylmystyq is toqtatyldy
ASTANA. KAZINFORM — Almatyda iri logıstıkalyq ortalyq salyp jatqan Wildberries kompanııasy negizsiz qylmystyq protseske tartylýdan qorǵaldy. Investorlardyń quqyqtaryn qorǵaý komıtetiniń aralasýynan keıin kompanııaǵa qatysty qylmystyq is toqtatyldy.
QR Bas prokýratýrasynyń málimetinshe, ınvestor komıtetke salynyp jatqan nysan aýmaǵynda tintý júrgizilip, qurylys tehnıkasyna mór basylǵanyn aıtyp júgingen. Bul jaǵdaı ınvestıtsııalyq jobanyń ári qaraı júzege asýyna qaýip tóndirgen.
Komıtettiń tapsyrmasymen Almaty prokýratýrasy qylmystyq istiń tirkelýi men qabyldanǵan protsestik sheshimderdiń zańdylyǵyn tekserdi.
Tekserý nátıjesinde qurylys jumystary kezinde merdiger men qosalqy merdiger arasynda týyndaǵan daýdyń azamattyq-quqyqtyq sıpatta bolǵany anyqtaldy. Qylmystyq qýdalaýǵa negiz bolmaǵan.
Komıtet prokýrory Raýan Álmishevtiń aıtýynsha, prokýratýranyń jedel aralasýy nátıjesinde ınvestordyń quqyǵy sotqa deıingi tergep-tekserý kezeńinde qorǵalǵan.
— 2026 jylǵy 2 qyrkúıekte qylmystyq is qylmys quramynyń bolmaýyna baılanysty toqtatyldy. Sonymen qatar, kináli laýazymdy tulǵalardy tártiptik jaýapkershilikke tartý máselesi kóterildi, — dedi ol.
Komıtet qylmystyq-protsestik sharalardy bızneske qysym kórsetý nemese ınvestıtsııalyq jobalardy iske asyrýǵa kedergi keltirý quraly retinde paıdalanýǵa jol berilmeıtinin atap ótti.
Eske salaıyq, buǵan deıin Saýda jáne ıntegratsııa mınıstrligi Wildberries qoıma keshenin yqtımal kóshirý máselesine qatysty málimdeme jasaǵan edi.
