Wildberries satýshylaryna nesıe tólemin úsh aıǵa keıinge qaldyrý múmkindigi usynyldy
ASTANA. KAZINFORM — Wildberries logıstıkalyq ortalyqtaryna jasalǵan shabýyldan zardap shekken satýshylarǵa WB Banki men MQU WB Finance nesıe tólemderin keıinge qaldyrý múmkindigin usyndy.
WB Banki men MKU WB Finance (satýshylarǵa qaryz beretin mıkroqarjy uıymy) Wildberries logıstıkalyq ortalyqtaryna jasalǵan shabýyl saldarynan taýar qorynan jáne kásipkerlik qyzmetinen zardap shekken shaǵyn jáne orta bıznes ókilderine nesıe demalysyn usyndy.
Bul shara Wildberries kompanııasy buryn jarııalaǵan qoldaý baǵdarlamasyn tolyqtyra túsedi. Onyń aıasynda satýshylarǵa alǵashqy qarjylaı ótemaqylar da tólene bastady.
WB Banki men MQU WB Finance-tiń shaǵyn jáne orta bıznes sanatyndaǵy klıentteri barlyq nesıe men qaryzdary boıynsha úsh aılyq tegin tólem keıinge qaldyrý múmkindigine ıe boldy. Osy kezeńde negizgi qaryzdy óteý de, paıyzdardy esepteý de ýaqytsha toqtatylady.
Soǵan sáıkes, kásipkerler kelesi nesıe nemese qaryz tólemin qazan aıynyń sońynda ǵana júzege asyrady.
Bul jeńildikti paıdalaný úshin satýshylardan eshqandaı ótinish nemese qosymsha qujat talap etilmeıdi. Nesıe demalysy avtomatty túrde qosylyp, bul týraly aqparat olardyń jeke kabınetterinde kórsetilgen.
Eger kásipker tólemdi keıinge qaldyrýdy qajet etpese jáne burynǵy keste boıynsha tólem jasaýdy qalasa, jeke kabınettegi arnaıy batyrma arqyly bul qyzmetten bas tarta alady nemese qoldaý qyzmetine júgine alady.
Al iri bıznes ókilderine qoldaý kórsetý máselesi ár kásiporyn boıynsha jeke tártippen qaralady.
Alibaba men Wildberries Qazaqstan naryǵyna ne usynyp otyrǵanyn myna siltemeden oqyńyz.
