Wildberries pen ozon Qazaqstan Týyn satýda zań buzǵan — Mádenıet mınıstrligi

ASTANA. KAZINFORM — Mádenıet jáne aqparat mınıstrligi bet-aýzyn tumshalaǵan dinı kıimdegi atyraýlyqtardyń Qazaqstan Týyn qorlaǵan sýreti týraly pikir ustanymyn málim etti.

— Wildberries.kz jáne ozon.kz ınternet-resýrstarynda ınternetke júrgizilgen monıtorıng nátıjeleri boıynsha Qazaqstan Respýblıkasynyń memlekettik rámizderi týraly zańnamasyn buzatyn materıaldy taratý bóliginde 2 zań buzýshylyq anyqtaldy. Qazirgi ýaqytta wildberries.kz ınternet-resýrsynan Qazaqstan Respýblıkasynyń arab jazýy bar Týynyń satylǵany týraly aqparat joıyldy. Qazaqstan Respýblıkasynyń zańnamasyn buzýshylyqtardy joıý jáne zańsyz materıaldy joıý sharalaryn qoldaný týraly ozon.kz ınternet-resýrsynyń ákimshiligine habarlama hat joldandy, — dep jazylǵan resmı málimette.

Sondaı-aq mınıstrlik osy oqıǵa boıynsha Іshki ister mınıstrligine hat joldaǵan. 

— Qazaqstan Respýblıkasy Qylmystyq kodeksiniń 372-babyna sáıkes Qazaqstan Respýblıkasynyń memlekettik rámizderin qorlaý qylmystyq jaýaptylyqqa ákep soǵady. Osyǵan baılanysty Qazaqstan Respýblıkasy Mádenıet jáne aqparat mınıstrligi Іshki ister mınıstrligine óz quzyreti sheginde protsessýaldyq sharalar qabyldaý týraly habarlama hat joldady, — delingen mınıstrlik taratqan aqparatta.

Mınıstrlik ІІM-nen naqty kimge qarsy shara qabyldaýdy suraǵanyn naqtyladyq.

— Standartqa saı emes Qazaqstan Týynyń sýretin jarnamalaýǵa atyraýlyq turǵyndar kináli me, álde Wildberries.kz jáne ozon.kz platftormalary kináli me, ony ІІM anyqtaıdy, — dep túsindirdi mınıstrliktegiler.

Buǵan deıin Atyraýda ózge tilde jazylǵan jazýy bar memlekettik týmen fotoǵa túskender ustalǵany málim bolǵan edi.