Wildberries marketpleısine shaǵym kóbeıdi – Arman Shaqqalıev problemany qalaı sheshpek

Saýda jáne ıntegratsııa mınıstri Arman Shaqqalıev Wildberries marketpleısine shaǵymnyń kóbeıgenin rastady, dep habarlaıdy Kazinform.

BAQ ókilderine arnalǵan baspasóz máslıhatynda tilshiler mınıstrge Wildberries ınternet-dúkeni elimizdegi «Tutynýshylardyń quqyqtaryn qorǵaý týraly» Zańdy saqtamaıtyndyǵyn aıtqan edi.

«Statıstıkalyq derekterge sáıkes, eger 2022 jyldyń 9 aıynda shamamen 1 500 shaǵym bolsa, osy jyldyń dál sondaı kezeńinde olardyń sany 4 esege artyp, shamamen 6 500-ge jetti. Mysalǵa Wildberries jaıly aıtar bolsaq, biz bul máseleni pysyqtap jatyrmyz. 600-den astam shaǵymdy qarastyrdyq», - dedi ol.

Osy rette mınıstr marketpleıs ishki saýda sýbektisi sanalatyndyǵyna nazar aýdartty.

«Zańǵa sáıkes, ishki naryq sýbektisi – bul elektrondy arna nemese statsıonarlyq saýda nysany bolǵanyna qaramastan ishki naryqta taýar satý qyzmetin júzege asyratyn zańdy, jeke tulǵalar. Sarapshylardyń jaǵdaıdy tolyqqandy retteý úshin «Tutynýshylardyń quqyqtaryn qorǵaý týraly» Zańǵa engiziletin ózgerister aıasynda ınternet-resýrstardy saýda nysandaryna teńestirý qajettigi týraly pikiri basqa másele. Biz bul usynysty talqylap jatyrmyz»,- dedi Arman Shaqqalıev.