Wildberries qoıma keshenin kóshirý: mınıstrlik málimdeme jasady
ASTANA. KAZINFORM – Saýda jáne ıntegratsııa mınıstrligi Wildberries qoıma keshenin yqtımal kóshirý máselesine qatysty málimdeme jasady.
– Saýda jáne ıntegratsııa mınıstrligi iri halyqaralyq saýda platformalarynyń logıstıkalyq ınfraqurylymynyń damý úrdisterin turaqty túrde baqylap otyrady. Qazirgi ýaqytta Wildberries kompanııasynan Qazaqstan Respýblıkasynyń aýmaǵynda qosymsha qoıma qýattaryn ornalastyrý máselesine qatysty mınıstrlikke resmı ótinish kelip túsken joq. Tıisti usynystar kelip túsken jaǵdaıda, olar Qazaqstan Respýblıkasynyń ulttyq múddelerin eskerile otyryp, zańnama talaptaryna sáıkes qaralady. Mınıstrlik úshin halyqaralyq kompanııalardyń kez kelgen jobalary eldiń ulttyq múddelerine saı, ózara tıimdi negizde júzege asyrylýy mańyzdy. Mundaı jobalar otandyq kásipkerler úshin jańa múmkindikter qalyptastyryp, Qazaqstan ekonomıkasyna ınvestıtsııa tartýǵa jáne jańa jumys oryndaryn ashýǵa yqpal etýi tıis, - delingen mınıstrlik habarlamasynda.
Qazaqstannyń tranzıttik jáne logıstıkalyq áleýeti joǵary. Osyǵan baılanysty mınıstrlik zamanaýı qoıma jáne logıstıkalyq ınfraqurylymdy damytýǵa, jańa jumys oryndaryn qurýǵa, sondaı-aq transshekaralyq elektrondyq saýdany ilgeriletýge baǵyttalǵan ınvestıtsııalyq jobalardy qoldaıdy.
Sonymen qatar taýarlardy tasymaldaý, saqtaý jáne aınalymǵa shyǵarý protsesteri Qazaqstan Respýblıkasynyń qoldanystaǵy zańnamasymen jáne Eýrazııalyq ekonomıkalyq odaqtyń quqyqtyq normalarymen retteledi.
Osyǵan baılanysty naryqtyń jekelegen qatysýshylary úshin qandaı da bir erekshe jaǵdaılar nemese arnaıy talaptar kózdelmegen.
Aıta keteıik, Wildberries satýshylaryna nesıe tólemin úsh aıǵa keıinge qaldyrý múmkindigi usynyldy.
