Wildberries Qazaqstanda iri logıstıkalyq ortalyqtar salady

NUR-SULTAN. QazAqparat – Wildberries halyqaralyq kompanııasy Qazaqstanda iri logıstıkalyq ortalyqtar salady. Bul týraly Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

Onyń sózine qaraǵanda, 43 qazaqstandyq kompanııa Alibaba-nyń altyn akkaýntynda saýda jasaıdy, taǵy 3 kompanııa vıtrına daıyndaýda. 21 qazaqstandyq kompanııa Wildberries-te saýda jasaıdy.

Saýda jáne ıntegratsııa mınıstrligi Qazaqstanda elektrondyq kommertsııany damytý aıasynda qazaqstandyq kompanııalardyń osy alańdarǵa shyǵýy jóninde Alibaba, Ebay, Amazon jáne Wildberries kompanııalarymen kelissózder júrgizýde.

B. Sultanovtyń aıtýynsha, 2022 jyldyń sońyna deıin Wildberries kompanııasy Qazaqstanda ınvestıtsııalyq jobany iske asyrady. Osy oraıda Nur-Sultan men Almaty qalalarynda shamamen 5 myń jumys ornyn quryp, alańy 100 myń sharshy metr bolatyn logıstıkalyq ortalyqtar salynady.