Wildberries, Kaspi, Ozon platformalary kimniń qansha saýda jasaǵanyn bizge aıtpaıdy – Qarjy vıtse-mınıstri

ASTANA. QazAqparat – Qarjy vıtse-mınıstri Erjan Birjanov Senatta ótken dóńgelek ústelde elektrondy saýdaǵa salyq salý máselelerin qalaı retteýge bolatynyn aıtty, dep habarlaıdy QazAqparat tilshisi.

«Elektrondy saýdany ákimshilendirý týraly aıtsaq, Wildberries, Kaspi, Ozon sııaqty platformalarmen sóılestik. Olarda resmı tirkelgen 84 myń azamat bar. Olar salyq salý júıesi boıynsha bizge esep bermeıdi. Atalmysh platformalar da kimniń qansha saýda jasaǵany týraly da derekterdi bermeıdi», - dedi mınıstrdiń orynbasary.

Onyń aıtýnysha, ásirese Kaspi Pay quraly boıynsha suraq kóp.

«Biz keri eseppen olardy anyqtap jatyrmyz. Halyq narazylyǵyn bildirýde. Eger osy platformalar arqyly salyq salý júıesin engizsek, búgin jasaǵan saýdańyzdan 0,1 nemese 1 paıyz salyq erteń-aq bıýdjetke tolyq kólemde túser edi. Sondyqtan agenttik, operatorlyq júıelerdi qoldaný kerek dep oılaımyz», - dedi Erjan Birjanov.