Wikipedia-nyń negizin qalaýshysy Qazaqstan jastaryna dáris bermek
ASTANA. QazAqparat - Astanada ótip jatqan «Rockfest» jastar festıvali aıasynda «Rocket Study» bilim berý ortalyqtary jelisiniń bas dırektory Arslan Dárimov jastarǵa baǵyttalǵan josparymen bólisti, dep habarlaıdy QazAqparat tilshisi.
Jastardyń oıyn-saýyq jáne bilim festıvalin uıymdastyrýshylar keleshekte sharanyń aıasyn keńeıtip, ony halyqaralyq deńgeıge jetkizýdi maqsat etip otyr. Jáne oǵan esimderi álemge áıgili tulǵalardy qonaq retinde shaqyrý josparlanýda.
Arslan Dárimovtiń aıtýynsha, jastarmen óz tájirıbesimen bólisýge shaqyrylatyn qonaqtardyń arasynda Wikipedia-nyń negizin qalaýshysy Djımmı Ýeıls bar.
«Biz Astanada Tech-ke baǵyttalǵan medıakommýnıkatsııalyq halyqaralyq forým uıydastyrýdy oılastyrýdamyz. Sharaǵa aıtýly eńbekterimen álemge esimderi belgili tulǵalardy shaqyrýdy qarastyrýdamyz. Olardyń qatarynda Wikipedia-nyń negizin qalaýshysy da bar. Sol sekildi ózge de tanymal tulǵalardy qonaq retinde shaqyryp, bizdiń jastarmen ómirde eńbekpen jetken jetistikterimen bólisse deımiz. Ózińiz oılap qarańyzshy, jaı ǵana mektep oqýshysy tabysty ári tanymal tulǵadan ómirlik tegin dáris-keńes alady», - dedi ol.
Al Astanada ótken «Rockfest» festıvaline qatysty aıtqan Arslan Dárimov, jastardyń belsendiligin jáne olardyń bilip-úırenýge degen joǵary yntasyn atap ótti.
«Búgingi sharanyń negizgi maqsaty - IT, medıakommýnıkatsııa jáne bıznes salasynda óz isin bastaımyn nemese kásibin endi bastaǵan jastardy biriktirý. Festıvalǵa atalǵan salalar boıynsha jetistikke jetken tabysty tulǵalar keldi. Olar óz aqyl-keńesterimen, tájirıbelerimen bólisti. Sharaǵa qatysqysy kelgen jastardyń qarasy kóp boldy. Sondyqtan irikteý ótkizip, úzdik dep tanylǵandardy shaqyrdyq», - dedi Arslan Dárimov.
Astanada kreatıvti jastarǵa arnalǵan «Rockfest» festıvali ótip jatqanyn buǵan deıin habarlaǵan bolatynbyz.
