WikiLeaks saıtyna aqparat berýshi Bredlı Mennıng 35 jylǵa túrmege qamalatyn boldy
ASTANA. 22 tamyz. QazAqparat - AQSh-ta burynǵy áskerı qyzmetker, atyshýly WikiLeaks saıtyna aqparat berýshi Bredlı Mennıng 35 jylǵa bas bostandyǵynan aıyryldy, dep habarlady RBK.
Ol 2010 jyly Irakta Djýlıan Assandjtyń WikiLeaks áshkereleýshi jobasyna 700 myń qupııa hattardy, sonyń ishinde AQSh-tyń Iraktaǵy armııasy áskerı qyzmetkerleriniń qylmystary jaıly aqparatty taratqany úshin ustalǵan bolatyn.
B.Mennıng aıyptaýlardyń 21 pýnktiniń 19-y boıynsha aıypty dep tabyldy, alaıda eń mańyzdy pýnkt - jaýǵa kómektesý boıynsha ol aqtalyp shyqty. Óıtpegende ol ómir boıy bas bostandyǵynan aıyrylar edi.
AQSh-tyń áskerı komandovanıesiniń málimeti boıynsha, Mennıngtiń áreketterinen kelgen zalaldyń mólsheri shamamen 6,2 mlrd. dollardy qurady.
