WikiLeaks saıty Iraktaǵy soǵys týraly qupııa qujattardy jarııalady
ASTANA. Qazannyń 23-i. QazAqparat - Qupııa málimetterdi jarııalaýmen aınalysatyn atyshýly WikiLeaks saıty Iraktaǵy soǵys týraly 392 myńdaı qupııa qujatty jarııalady. Bul týraly atalmysh saıtta ornalastyrylǵan baspasóz baıanynda aıtylyp otyr. Jarııalanǵan qupııa materıaldar 2009 jyldyń qańtar aıy men 2009 jyldyń jeltoqsan aıynyń aralyǵyn qamtyǵan, dep habarlaıdy RBK agenttigi.
Qujattarda atap kórsetilgendeı, osy aralyqta Irakta 109 myńdaı adam qaza tapqan. Olardyń 66 myńy - beıbit turǵyndar bolsa, 23 myń 984-i - sodyrlar, 15 myń 196-sy - Irak úkimettik armııasynyń áskerıleri men polıtsııa qyzmetkerleri, 3 myń 771-i - AQSh pen olardyń odaqtastarynyń jaýyngerleri. Orta eseppen Irakta bir kúnde 31 beıbit turǵyn qaza bolyp otyrǵan. Bul málimet resmı statıstıkadan áldeqaıda joǵary ekenin aıta ketý kerek.
Saıtta jarııalanǵan qupııa qujattardyń qatarynda, sondaı-aq AQSh pen ırak armııasy áskerıleriniń, sondaı-aq quqyq qorǵaý organdary ókilderiniń áskerı qylmystary týraly málimetter de bar. Atap aıtqanda, Iraktyń quqyq qorǵaý organdarynyń qyzmetkerleri AQSh áskeriniń baqylaýyndaǵy aýmaqtarda ustalǵan adamdardy azaptaǵany týraly derekter bar. Al Iraktaǵy AQSh armııasynyń qolbasshylyǵy ondaı qylmystarǵa kózin jumyp qarap, Irak polıtsııasynyń ustalǵan azamattardy azaptaý faktilerimen baılanysty oqıǵalardy tekserýge tyıym salý týraly arnaıy buıryq shyǵarǵan.
