Wifi Bus Astana qyzmetimen 1 mıllıonnan astam adam paıdalanǵan
ASTANA. QazAqparat - 2015 jyldyń 1 shildesinde Astanada Wifi Bus Astana pılotty jobasy iske qosylǵan bolatyn. Sonyń negizinde qalanyń qoǵamdyq kólikteri tegin ınternetpen qamtamasyz etildi. Atalmysh joba Astana qalasy ákimdigimen birlese júzege asyrylǵan. Joba aıasynda barlyq qala avtobýstary qamtyldy, olardyń jalpy sany 550 danany quraıdy.
Bul týraly Astana qalasy ákimdiginiń resmı saıtynda habarlandy.
Wifi Bus Astana jobasynyń basty maqsaty - jolaýshylarǵa qolaıly jaǵdaı jasaý jáne olardy qajetti aqparatpen qamtý bolyp tabylady. Kez-kelgen qoǵamdyq kólik paıdalanýshysy Wi-fi arqyly kerekti marshrýt pen aıaldamalar týraly aqparatty ala alady.
30 kún ishinde Wifi Bus Astana qyzmetin paıdalanýshylardyń sany 1 mıllıon 26 myń adamdy qurady. Táýligine, ortasha eseppen, bir avtobýsta 114 qoldanýshy Wifi Bus Astana qyzmetine júginedi. Ótken aı kóleminde bir ǵana avtobýstyń jolaýshylary 2565 gıgabaıt aqparatty paıdalanǵan bolatyn. Júrgizilgen zertteýler nátıjesinde jolaýshylardyń kóbinde mýzyka tyńdap, áleýmettik jeliler úshin Wifi Bus Astana qyzmetin paıdalanatyny belgili boldy.
