WIC 2025: Almaty ınklıýzıvti bilim berýdiń jahandyq haby retinde tanyldy
ASTANA. KAZINFORM — Búgin ınklıýzıvti bilim berý boıynsha alǵashqy Dúnıejúzilik kongress (World Inclusion Congress — WIC 2025) óz jumysyn aıaqtady, dep habarlaıdy Oqý-aǵartý mınıstrligi.
Sarapshylar, pedagogter, memlekettik jáne qoǵamdyq uıymdardyń ókilderi, sondaı-aq tehnologııalyq ındýstrııa kóshbasshylary Almatyda bas qosyp, balalar úshin sapaly, qaýipsiz jáne qoljetimdi bilim berý júıesin qalyptastyrý joldaryn talqylady.
Qazaqstannyń alańynda uıymdastyrylǵan bul álemdik kongress ınklıýzıvti bilim berý salasynda jahandyq dıalogtyń jańa kezeńin ashqan mańyzdy oqıǵa boldy.
Kongrestiń birinshi kúni «Inklıýzıvti bilim berýdegi jahandyq trendter: syn-qaterler men sheshimder» taqyrybynda dóńgelek ústel ótti. Munda QR Oqý-aǵartý mınıstri Juldyz Súleımenova Inklıýzıvti bilim berý jónindegi Almaty deklaratsııasyn talqylaýdy usyndy.
— Deklaratsııada ınklıýzııany bilim berý júıesiniń ózegine aınaldyrý, tsıfrlyq tehnologııalar men jasandy ıntellektti ınklıýzııany damytýdyń tıimdi quraly retinde paıdalaný, sapaly bilimge teń qoljetimdilikti qamtamasyz etý, halyqaralyq yntymaqtastyq pen bilim almasýdyń turaqty alańdaryn qurý, damýshy elderge qoldaý kórsetý jáne monıtorıng pen esep berý júıesin engizý máseleleri qamtyldy, — delingen habarlamada.
Qatysýshylar deklaratsııany ıÝNESKO-ǵa joldap, ony ınklıýzıvti bilim berý saıasatyn jetildirý úshin qatysýshy memleketterge taratýdy usyndy. Bul qadam Qazaqstannyń aımaqtyq kóshbasshy jáne halyqaralyq bastamashy retindegi mártebesin bekitti.
«Qoljetimdilik. Teńdik. Órleý» taqyryby aıasynda 23 paneldik sessııa uıymdastyrylyp, 160-qa jýyq taqyryp talqylandy. Oǵan 3 myńǵa jýyq tyńdaýshy qatysty. Sarapshylar erekshe bilim berýdi qajet etetin balalarǵa arnalǵan emotsııalyq jáne fızıkalyq turǵydan qaýipsiz orta qalyptastyrý, aýtızm spektrindegi jáne zııatkerlik buzylystary bar balalarǵa keshendi qoldaý kórsetý, pedagogterdiń kásibı damýyn qamtamasyz etý, EdTech pen jasandy ıntellektti oqytý protsesine engizý, joǵary bilim men eńbek naryǵyna teń qoljetimdilikti qamtamasyz etý sııaqty mańyzdy máselelerdi kóterdi.
Kongress aıasynda ótken Innovation Expo kórmesine Qazaqstan, Ulybrıtanııa, Qytaı, AQSh, Polsha jáne Ońtústik-Shyǵys Azııa elderinen 17 kompanııa qatysty. Kórmede ınklıýzıvti bilim berý men qoljetimdi orta qalyptastyrýǵa arnalǵan ozyq tsıfrlyq sheshimder usynyldy. Qatysýshylar beıimdelgen oqytý platformalary, ıntellektýaldy beınebaqylaý júıeleri, derbestendirilgen oqý quraldary men EdTech-tehnologııalardy tanystyrdy.
WIC 2025 nátıjesinde Almaty ınklıýzıvti bilim berýdiń jahandyq haby retinde tanyldy.
Budan buryn erekshe bilim berýdi qajet etetin balalar úshin ınklıýzıvti oqý-ádistemelik quraldar tizbegi bekitiletini habarlandy.