Wi-Fi, USB, bıodárethana: Qazaqstandaǵy eń uzaq baǵyttaǵy poıyz jańardy
ASTANA. KAZINFORM — Qazaqstandaǵy eń uzaq temirjol baǵyty — № 37/38 «Mańǵystaý — Semeı» poıyzy otandyq RWS Wagon zaýytynda shyǵarylǵan jańa jolaýshylar vagondarymen jańartyldy.
Batys óńirine barlyǵy 70-ten astam jańa vagon jetkizildi. Sondaı-aq № 109/110 «Mańǵystaý — Aqtóbe» poıyzynyń quramy da osy vagondarmen jańartyldy.
Jolaýshylar vagondary parkin jańartý — Memleket basshysynyń tapsyrmasyna sáıkes júzege asyrylyp jatqan temirjol salasyndaǵy strategııalyq mańyzdy mindetterdiń biri. Osy baǵytta «Jolaýshylar tasymaly» AQ jolaýshylarǵa qolaıly jaǵdaı jasaý jáne qyzmet kórsetý sapasyn arttyrý maqsatynda vagon parkin kezeń-kezeńimen jańartyp keledi.
Jańartylǵan № 37/38 «Mańǵystaý — Semeı» poıyzy 9 vagonnan turady. Onyń tórteýi — kýpeli, tórteýi — platskart, bireýi — vagon-meıramhana. 2025–2026 jyldary otandyq zaýytta shyǵarylǵan jańa vagondardan jasaqtalǵan poıyzda 331 jolaýshyǵa arnalǵan oryn bar.
— Jańa vagondar qaýipsizdik pen jaılylyqtyń zamanaýı talaptaryna saı jasalǵan ári elektr qýatyn únemdi tutynady. Іshki jabdyqtary uzaq ýaqyt paıdalanýǵa tózimdi materıaldardan ázirlengen. Jolaýshylardyń jaılylyǵy úshin vagondarda aýa temperatýrasyn retteý jáne aýany zalalsyzdandyrý júıeleri, yńǵaıly jatyn oryndar, USB qýattaý porttary, 220 V elektr rozetkalary, Wi-Fi jelisi men bıodárethanalar ornatylǵan. Sondaı-aq vagondardyń jylý oqshaýlaý sapasy jaqsartylǵan, — delingen habarlamada.
Jolaýshylardyń qaýipsizdigin qamtamasyz etý úshin beınebaqylaý jáne órt sóndirý júıeleri qarastyrylǵan. Ortalyqtandyrylǵan aýa baptaý júıesi vagon ishindegi temperatýrany jyl boıy birqalypty ustap turýǵa múmkindik beredi. Budan bólek, vagondar dybystyq habarlaý júıesimen, shyǵý esikterin kórsetetin jaryq belgilerimen, náreste jórgekteýge arnalǵan ústeldermen jáne jeke seıftermen jabdyqtalǵan. Іshki árleýde allergııa týdyrmaıtyn materıaldar paıdalanylǵan.
Poıyz bıletterin bilet.railways.kz resmı saıtynan jáne temirjol vokzaldarynyń kassalarynan satyp alýǵa bolady. Tolyq aqparatty 1433 tegin nómirine habarlasyp bilýge bolady.
Osyǵan deıin Astananyń eki vokzaly arasynda 237 teńgege jetýge bolatynyn jazǵanbyz.