WhatsApp jańa habarlamany redaktsııalaý fýnktsııasyn qosady

SAN-FRANTsISKO. QazAqparat - WhatsApp paıdalanýshylarǵa habarlamalardy redaktsııalaýǵa múmkindik beretin jańa fýnktsııa qosylǵanyn jarııalady, dep habarlaıdy QazAqparat BBC News-ke silteme jasap.

Kompanııa habarlamalardy jiberilgennen keıin 15 mınýt ishinde óńdeýge bolatynyn málimdedi.

Lezde habar almasý qyzmeti Facebook pen Instagram-ǵa ıelik etetin amerıkalyq tehnologııalyq alpaýyt Meta-nyń bóligi.

Bul múmkindik aldaǵy aptalarda WhatsApp-tyń 2 mlrd paıdalanýshysyna qoljetimdi bolady. Áleýmettik jeli qyzmetin paıdalanýshylardyń eń kóp sany - Úndistanda (487 mln).

Endi óńdelgen habarlama alýshylarǵa mazmunnyń ózgertilgenin habarlaý úshin «redaktsııalanǵan» dep belgilenedi. Alaıda, onyń ýaqyt óte kele qalaı ózgergeni olarǵa kórsetilmeıdi.