WhatsApp-ta kıberalaıaqtyqtyń jańa túri paıda boldy

ASTANA.KAZINFORM - Qazaqstan Bas prokýratýrasy quqyqtyq statıstıka jáne arnaıy esepke alý jónindegi komıtetiniń qylmystyq qaýip-qaterlerdiń jáne qoǵamdyq qaýipsizdiktiń táýekelderin boljaý ortalyǵy WhatsApp messendjerine qatysty jańa kıberqater týraly eskertti.

Sheteldik derekkózderdiń málimetine sáıkes kıberalaıaqtar WhatsApp akkaýnttaryn basyp alýdyń jańa qylmystyq shemasyn qoldanyp jatyr. Bul ádis GhostPairing dep atalady jáne parolderdi buzýdy, SIM-kartalardy aýystyrýdy nemese kúrdeli tehnıkalyq shabýyldardy qajet etpeıdi.

Alaıaqtar WhatsApp-qa zańdy túrde, qosymsha qurylǵylardy baılanystyrý fýnktsııasyn paıdalaný arqyly qol jetkizedi.
Stsenarııi qarapaıym. Paıdalanýshyǵa Facebook nemese WhatsApp atynan jasyrynǵan habarlama jiberiledi, ol Facebook pen WhatsApp ınterfeısin vızýaldy túrde qaıtalaıtyn jalǵan paraqshalarǵa baǵyttaıdy.

Kontentke qoljetimdilikti rastaý úshin feık-paraqsha telefon nómiri men rastaý kodyn engizýdi usynady, osydan keıin zııankes avtomatty túrde jábirlenýshiniń akkaýntyna senimdi qurylǵy retinde qosylyp, WhatsApp-qa tolyq qol jetkizedi (habarlamalardy oqý, medıafaıldardy qaraý, baılanystar tizimi, habarlama jiberý, fotogalereıaǵa qoljetimdilik). Bul rette telefon ádettegideı jumys isteı beredi jáne kúdik týdyrmaıdy.

WhatsApp-ty basyp alýyn anyqtaýdyń jalǵyz joly - «Baılanystyrylǵan qurylǵylar» bólimin qolmen tekserý. Kez kelgen belgisiz qosylý akkaýnttyń buzylǵanyn kórsetedi jáne dereý joıylýy tıis.

Polıtsııa qyzmetkerleri kıberqaýipsizdik talaptaryn saqtaýǵa shaqyrady. Belgisiz kiris habarlamalarǵa, qońyraýlarǵa jáne ár túrli habarlandyrýlarǵa muqııat bolýdy eskertedi. WhatsApp kodyn bógde paraqshalarǵa engizbeýge, eki faktorly aýtentıfıkatsııany paıdalanýǵa akkaýntyńyzdyń belsendiligin turaqty túrde tekserip otyrýǵa keńes beredi.

Aıta keteıik, ulttyq kompanııa atyn jamylǵan alaıaqtar kóbeıdi.

Shymkentte halyqaralyq izdeýde bolǵan alaıaq áıel ustaldy.