WhatsApp-ta habarlamany dostaryńmen bólisýge shekteý qoıyldy
ASTANA. QazAqparat - Facebook Inc engizgen jańa erejelerge sáıkes, WhatsApp messendjerin paıdalanýshylarǵa bir habarlamany besten kóp adamǵa qaıta jiberýge tyıym salyndy. Kompanııa bul sheshim jalǵan aqparattarmen kúresti kúsheıtý úshin jasalyp otyrǵanyn habarlady.
«Kompanııanyń saıasat jáne kommýnıkatsııa boıynsha vıtse-prezıdenti Vıktorııa Grand Djakartada ótken sharada atalǵan shekteý týraly aıtty. Byltyr jaz aıynda Úndistandaǵy tutynýshylarǵa týra osyndaı shekteý qoıylǵan edi. Álem boıynsha jıyrma adamǵa habarlamany qaıta jiberýge bolatyn edi. Endi barlyq elderdegi messendjer paıdalanýshylary osy erejege baǵynady», - dep jazdy The Guardian basylymy.
Basylymnyń resmı saýalyna jaýap bergen WhatsApp kompanııasynyń kommýnıkatsııa bóliminiń basshysy Karl Výg tutynýshylardyń eń jaqyn aralasatyn dostarynyń sany beseýden aspaıdy dep oılaıtyndyqtan, osy shekteýge toqtalǵanyn aıtqan. «Bul messendjerdi teris maqsatta paıdalanýǵa shekteý qoıady dep oılaımyz», - dedi ol.
Esterińizge sala ketsek, byltyr Úndistanda atalmysh qosymsha arqyly balalar urlyǵy týraly taraǵan habarlamalar leginen keıin, kelip túsken habarlamany bes adamǵa ǵana qaıta jiberýge shekteý qoıylǵan bolatyn. Úndistanda WhatsApp messendjeriniń 200 mıllıon tutynýshysy bar.
