WhatsApp paıdalanýshylary hat almasý kezinde telefon nómirin jasyra alady
ASTANA. KAZINFORM — WhatsApp messendjeri jańa adamdarmen telefon nómirin jarııalamaı-aq baılanysýǵa múmkindik beretin paıdalanýshy aty (username) fýnktsııasyn kezeń-kezeńimen engize bastady, dep habarlaıdy Kazinform agenttiginiń tilshisi.
Jańa múmkindik jańa tanystarmen, mysaly, birge oqıtyndarmen, kórshilermen nemese túrli is-sharalarda tanysqan adamdarmen sóıleskende qupııalylyqty arttyrýǵa arnalǵan. Sondaı-aq bul fýnktsııa toptyq chattarda da jumys isteıdi. Sonyń arqasynda paıdalanýshylar beıtanys qatysýshylarǵa telefon nómirin kórsetpeı-aq áńgimege qosyla alady.
Kompanııanyń málimetinshe, osy aptadan bastap paıdalanýshylar qosymshanyń sońǵy nusqasynda «Parametrler» → «Akkaýnt» → «Paıdalanýshy aty» bólimi arqyly ózine unaıtyn atty aldyn ala brondaı alady. Mundaı múmkindik aldyn ala usynylyp otyr, óıtkeni servısti álem boıynsha 3 mıllıardtan astam adam paıdalanady jáne kóptegen qoldanýshy birdeı ataýdy tańdaýy múmkin.
Paıdalanýshy atyn qoldaný mindetti emes. WhatsApp baılanys ornatqysy keletin adamdar ǵana biletin biregeı atty tańdaýǵa keńes beredi. Eger tańdalǵan ataý bos bolmasa, qosymsha kiriktirilgen generator arqyly basqa qoljetimdi nusqalardy usynady.
Kontent avtorlary, shaǵyn bıznes ókilderi men uıymdar Instagram nemese Facebook jelilerinde qoldanatyn ataýyn WhatsApp-ta da paıdalana alady. Alaıda basqa keıbir messendjerlerden ereksheligi, WhatsApp-ta paıdalanýshy attary boıynsha izdeý nemese olardyń jalpy katalogy bolmaıdy. Adamǵa alǵash ret habarlama jiberý úshin onyń naqty paıdalanýshy atyn bilý qajet.
Qosymsha qaýipsizdik úshin paıdalanýshy atynyń arnaıy kiltin qosýǵa bolady. Alǵashqy habarlamany jibermes buryn osy kiltti engizý talap etiledi.
Fýnktsııa iske qosylǵannan keıin paıdalanýshy atyn qosqan adamdar nemese kompanııalarmen telefon nómirin kórsetpeı-aq hat almasýǵa múmkindik týady.
Jańa múmkindik aldaǵy birneshe aı ishinde kezeń-kezeńimen barlyq paıdalanýshylarǵa qoljetimdi bolady. Maqalanyń aǵylshyn tilindegi nusqasyn osy jerden oqı alasyz.
Buǵan deıin WhatsApp foto men vıdeony jyldam jiberýdiń jańa tásilin synaqtan ótkizip jatqany habarlanǵan edi.
Sonymen qatar Meta Instagram, Facebook jáne WhatsApp-ta aqyly fýnktsııalardy iske qosqany belgili boldy.
