WhatsApp messendjeriniń jańa qyzmeti tanystyryldy
ASTANA. KAZINFORM — Álemdegi eń tanymal habar almasý qosymshalarynyń biri WhatsApp qoldanbasy paıdalanýshylarǵa «Toptyq habarlamalar tarıhy» dep atalatyn jańa múmkindikti usyndy. Meta kompanııasy muny «kóp suranysqa ıe múmkindikterdiń biri» dep atady.
Top ákimshileri men músheleri endi jańa paıdalanýshylarǵa sońǵy chat habarlaryn jibere alady, Bul múmkindik óte suranysqa ıe boldy jáne ártúrli platformalarda qoljetimdi.
Topqa jańa músheni qosqanda, oǵan eń sońǵy 100 habardy qaıta jiberýge bolady. Osylaısha olar taqyryptar boıynsha talqylaýlarǵa jyldam qatysady. Bul skrınshot jasaý nemese sóılesýlerdi qaıta terý qajettiligin joıady. Jańa paıdalanýshylar tańdalǵan sońǵy habarlarǵa ǵana qol jetkize alady, al toptyń basqa músheler naqty qaı jazbalar bólisilgenin kóredi.
Meta kompanııasy bul múmkindik qupııalylyqty saqtaıtynyn málimdedi. WhatsApp jelisiniń jańa qyzmetine paıdalanýshylar birtindep qosylatyn bolady.
Eske salaıyq, buǵan deıin WhatsApp chattardy tazalaýǵa múmkindik beretin jańa fýnktsııany jetildirgen bolatyn. Onda paıdalanýshylar chatty tolyq tazalamas buryn óshirgisi kelmeıtin habarlamalardy belgileı alady.