WhatsApp-qa birneshe jańa fýnktsııa engizildi
ASTANA. KAZINFORM - WhatsApp chattardy tazalaýǵa múmkindik beretin jańa fýnktsııany jetildirip jatyr. Endi paıdalanýshylar chatty tolyq tazalamas buryn óshirgisi kelmeıtin habarlamalardy belgileı alady.
«Chatty tazalaý» optsııasyn tańdaǵannan keıin áreketti naqtylaıtyn eskertý shyǵady, sondaı-aq medıa faıldardy qurylǵy galereıasynan joıý múmkindigi de bar.
Jańa fýnktsııada chatty tazalaý kezinde qosymsha tereze paıda bolady. Onda «juldyzshamen belgilengen habarlamalardy da joıý kerek pe?» degen suraq qoıylady. Bul mańyzdy aqparattar men qajetti faıldardyń abaısyzda joıylyp ketpeýi úshin qarastyrylǵan.
Sonymen qatar, paıdalanýshylar qaı medıa faıldardy joıý keregin tańdaı alady. ıAǵnı, burynǵydaı tek «barlyǵyn tazalaý» emes, «tek habarlamalardy joıý», «tek medıa faıldardy joıý» nemese «ekeýin birge joıý» optsııalary da qoljetimdi. Tazalaýdy rastamas buryn WhatsApp joıylatyn derekter arqyly qansha jady bosaıtynyn kórsetedi. Qazirgi ýaqytta bul jańa fýnktsııa tek Android β-nusqasynda qoljetimdi.
Jeli odan bólek qazan aıynda alaıaqtardan qorǵaıtyn taǵy birneshe ózgeris engizgen edi.
– Vıdeoqońyraý kezinde beıtanys adamǵa ekrandy kórsetýge áreket jasasańyz eskertý shyǵady. Alaıaqtar keıde adamdardy ózderiniń ekrandaryn kórsetýge májbúrlep, banktik málimetter nemese rastaý kodtary sııaqty jeke aqparatty alýǵa tyrysatynyn bilemiz. Bul jańa qural paıdalanýshylarǵa alaıaqtyq áreketterdi anyqtaý men odan saqtaný úshin qosymsha aqparat beredi, – delingen Meta kompanııasynyń resmı saıtynda.
Odan bólek WhatsApp azamattarǵa alaıaqtyqpen aınalysatyn kontaktilerdi anyqtaýǵa da kómektespek.
– Chattarda alaıaqtyqty anyqtaýdyń jetildirilgen tásilin synaqtan ótkizip jatyrmyz. Eger bul tásil qosylar bolsa jáne jańa kontaktińiz kúdikti habarlama jiberse, sizge eskertý shyǵady. Sondaı-aq sońǵy chat habarlamalaryńyzdy JI arqyly tekserip, alaıaqtyq áreketterin anyqtaýǵa múmkindik alasyz. Eger kúdikti áreketter anyqtalsa, sizge keń taraǵan alaıaqtyq túrleri týraly aqparat beriledi jáne akkaýntty bloktaý nemese habarlaý sııaqty áreketter usynylady, – dedi WhatsApp ázirleýshileri.
Oǵan qosa, Meta akkaýnttardy qorǵaýdy odan ári jaqsartty. Endi Facebook, Messenger jáne WhatsApp-ta Passkey arqyly akkaýntqa tek siz kire alatyndaı, saýsaq izi, bet skaneri nemese PIN kodpen jeke tulǵańyzdy rastaýǵa bolady. Sondaı-aq, Security Checkup (Facebook, Instagram) jáne Privacy Checkup (WhatsApp) quraldary qaýipsizdik pen qupııalyq baptaýlaryn qaraýǵa, qajet bolsa paroldi jańartýǵa jáne topqa qosý sııaqty qupııalyq parametrlerin retteýge kómektesedi.
Osyǵan deıin WhatsApp-ta chattar men arnalardy avtomatty túrde aýdarý múmkindigi paıda bolǵany týraly jazdyq.