WhatsApp ata-ana baqylaýyn kúsheıtedi: qandaı fýnktsııalar paıda bolady
ASTANA. KAZINFORM — WhatsApp jasóspirimderdiń qaýipsizdigin qadaǵalaýǵa arnalǵan ata-ana múmkindikterin keńeıtpek. Jańa baptaýlar ata-analarǵa balasynyń jeke derekterin qorǵaýǵa qatysty keıbir parametrlerin basqarýǵa jáne onyń belgili bir áreketteri týraly habarlama alyp otyrýǵa múmkindik beredi, dep habarlaıdy BBC.
Jasóspirim qandaı da bir topqa qosylsa nemese odan shyqsa, bul týraly ata-anasyna habarlama keledi. Sonymen qatar olar balasynyń WhatsApp-taǵy jeke paraqshasyna qatysty birqatar baptaýdy ózderi retteı alady.
Bul rette jasóspirimniń jeke hat-habaryna ata-anasy qol jetkize almaıdy. Olar balasynyń kimge jazǵanyn, qandaı habarlama jiberip ne alǵanyn jáne kimmen sóıleskenin kórmeıdi. Bul aqparat qupııa túrde qorǵalyp, arnaıy qaýipsizdik júıesi arqyly saqtalady.
Jańa múmkindikterdi ár otbasy óz qalaýyna qaraı paıdalanady. Ata-analar baptaýlardy kez kelgen ýaqytta ózgertip, qajet bolsa, bul múmkindikterdi tolyq óshire alady.
Bul baptaýlardy basqarý úshin ata-ana arnaıy PIN-kod ornatady. Eger jasóspirim qoıylǵan shekteýlerdi óz betinshe alyp tastaýǵa áreket etse, sol kodty engizýi qajet bolady.
Ata-ana jasóspirimniń profıl sýretin kimder kóre alatynyn jáne ony topqa kimder qosa alatynyn da shekteı alady. Sondaı-aq balaǵa WhatsApp-taǵy arnalardy paıdalanýǵa ruqsat berýdi nemese shekteýdi ata-ana ózi sheshedi. Arnalarda uıymdar men qoǵam belsendileri túrli aqparat pen kontent jarııalaıdy.
Jańartýda WhatsApp-qa kiriktirilgen Meta AI kómekshisine de ózgeris engiziledi. Ata-ana «13+» standartty rejımin tańdaı alady nemese mazmuny qatańyraq súzgiden ótetin «Shekteýli kontent» rejımin iske qosa alady.
WhatsApp ókilderi jańa múmkindikter ata-ana men jasóspirim arasynda messendjerdi paıdalaný jóninde ashyq áńgime qalyptastyryp, jeke hat-habardyń syrt kózge jarııa bolmaýyn qamtamasyz etýge baǵyttalǵanyn atap ótti.
Áleýmettik jeliler sarapshysy Mett Navarra atalǵan baptaýlardy ata-analar óz erkimen qosatynyna nazar aýdardy. Onyń pikirinshe, mundaı jaǵdaıda Meta qoldanýshylardyń jasyn anyqtaý jaýapkershiliginen birshama bosap, jasóspirimderdiń qaýipsizdigine qatysty mindettiń bir bóligin otbasyna júkteýi múmkin.
Navarra ata-analardyń bul múmkindikterdi qanshalyqty jıi paıdalanatyny ázirge belgisiz ekenin de atap ótti.
Bul ózgeris tehnologııalyq kompanııalarǵa balalardyń qaýipsizdigin kúsheıtý talaby artyp otyrǵan tusta engizilip otyr. Úkimetter men retteýshi organdar tsıfrlyq platformalarda balalar men jasóspirimderdiń qaýipsizdigin qamtamasyz etýdi talap etip keledi.
Buǵan deıin WhatsApp 13 jasqa deıingi balalar úshin shekteýli fýnktsıonaldy arnaıy akkaýnttardy iske qosatynyn habarlaǵan bolatynbyz. Ata-analar men qamqorshylar balamen kimderdiń baılanysa alatynyn jáne onyń qandaı toptarǵa qosyla alatynyn baqylaı alady.
