WhatsApp arqyly aqsha tabamyn degender qylmystyq jaýapkershilikke tartylýy múmkin – ІІM

ASTANA. KAZINFORM – WhatsApp messendjerinde óz telefon nómirine akkaýnt ashyp, ony basqa adamǵa aqyly túrde berýdi usynatyndar alaıaqtyq shemanyń bir bóligi bolýy múmkin. Qazaqstan Іshki ister mınıstrligi osyndaı jolmen tabys tabýdyń qaýipti ekenin jáne onyń sońy qylmystyq jaýapkershilikke ákelýi múmkin ekenin eskertti.

WhatsApp_moshennıchestvo
Foto: Kazinform/II

ІІM málimetinshe, mundaı shemalarǵa «aktıvatorlar» dep atalatyn adamdar tartylady. Olar messendjerlerde akkaýnt ashyp, keıin oǵan kirý múmkindigin úshinshi tulǵalarǵa beredi. Al alaıaqtar bul akkaýnttardy azamattarǵa qońyraý shalý jáne ózge de zańsyz áreketter jasaý úshin paıdalanady.

Sonymen qatar mundaı qosymsha tabys tabýǵa kelisken adam ózi tirkegen akkaýnttyń shyn máninde qandaı maqsatta qoldanylatynyn bilmeýi múmkin.

Buǵan deıin mınıstrlik mundaı zańsyz shemalarǵa kámeletke tolmaǵan jasóspirimderdiń de tartylatynyna nazar aýdarǵan. Olar aqshalaı syıaqy úshin SIM-kartalardy belsendiredi jáne messendjerlerde akkaýnttar tirkeıdi. Keıin bul akkaýnttar qaskóılerdiń qolyna ótedi.

Mınıstrlik ókilderiniń eskertýinshe, mundaı áreketterge sanaly túrde qatysý qylmysqa kómektesý retinde baǵalanýy múmkin.

Alaıaqtyq shemanyń qurbany nemese qatysýshysy bolyp qalmaý úshin polıtseıler birneshe qarapaıym erejeni saqtaýǵa keńes beredi. Atap aıtqanda, beıtanys adamdar úshin messendjerde akkaýnt tirkemeý, jeke akkaýntqa kirý múmkindigin bógde adamdarǵa bermeý jáne ońaı aqsha tabýǵa ýáde etetin kúmándi usynystardan bas tartý qajet.

Sondaı-aq polıtsııa ata-analarǵa jasóspirimderge erekshe nazar aýdarýdy eskertedi. Balalarǵa óz telefon nómirine tirkelgen akkaýnttardy bógde adamdarǵa berýdiń sońy eleýli quqyqtyq saldarǵa ákelýi múmkin ekenin túsindirý mańyzdy.

Buǵan deıin WhatsApp pen Telegram alaıaqtary adamdardy qalaı arbaýyna túsiretinin jazǵanbyz.