WhatsApp arqyly adamdardy aldaıtyn alaıaqtarǵa sim-karta satqandar ustaldy

TALDYQORǴAN. KAZINFORM – Jetisý oblysy jáne Astana qalasy Polıtsııa departamentteriniń qyzmetkerleri ІІM Kıberqylmysqa qarsy is-qımyl departamentiniń úılestirýimen ınternet-alaıaqtyqqa qatysy bar qylmystyq toptyń jolyn kesý boıynsha operatsııany sátti júrgizdi, – dep habarlady Polisia.kz.

Internet-alaıaqtyqpen baılanysty qylmystyq isterdi tergeý barysynda qylmys jasaý úshin paıdalanylǵan kóptegen sim-kartanyń iske qosylǵan orny anyqtaldy. Jedel-izdestirý is-sharalarynyń nátıjesinde Jetisý oblysynyń 24 jáne 25 jastaǵy eki turǵyny ustaldy.

Olardyń biri Jambyl aýylynda, ekinshisi Qaratal aýdanynyń Dostyq aýylynda turǵan. Kúdiktiler sim-kartalardy iske qosyp, WhatsApp messendjerine tirkelip, Qazaqstan azamattaryn aldaýmen aınalysatyn alaıaqtarǵa satqan.

Qylmys kelesi shema boıynsha júzege asyrylǵan: qaskóıler ózderiniń jeke derekterin paıdalanyp, Tele2 qosymshasy arqyly abonenttik nómirlerdi tirkegen. Sodan keıin basqa qosymshalardyń kómegimen nómirlerdi iske qosyp, olardy Telegram-kanaldar arqyly 500-den 1500 teńgege deıingi baǵamen satqan.

Kúnine 100-ge deıin sim-karta tirkegen. Tintý barysynda ustalǵandardan 17 uıaly telefon, eki noýtbýk, bir modem jáne 1000-ǵa jýyq sim-karta tárkilendi.

Tergeý jalǵasyp jatyr. Ustalǵandardyń basqa alaıaqtarmen baılanysy tekserilip jatyr.

Jetisý oblysynda birneshe márte alaıaqtyq jasaǵan áıel sottalǵanyn jazǵan bolatynbyz.