WhatsApp akkaýntyna bóten qurylǵy qosylsa, ne isteý kerek – ІІM keńesi
ASTANA. KAZINFORM – Jeke derekterdi qorǵaý maqsatynda Іshki ister mınıstrligi WhatsApp messendjerindegi akkaýnttarǵa ruqsatsyz qol jetkizý faktileri týraly eskertedi.
ІІM akkaýntyńyzdyń qaýipsizdigin kúsheıtý úshin eki satyly tekserýdi qosýdy usynady.
Ol úshin WhatsApp qosymshasyn ashyp, «Baptaýlar» bólimine ótińiz, «Akkaýnt», odan keıin «Eki satyly tekserý» bólimin tańdap, «Qosý» batyrmasyn basyńyz. Alty tańbaly PIN-kod ornatyp, qoljetimdilikti qalpyna keltirýge arnalǵan elektrondyq poshta mekenjaıyn engizińiz. Ornatylǵan PIN-kodty eshkimge habarlamańyz.
Sondaı-aq akkaýntyńyzǵa qosylǵan qurylǵylardy turaqty túrde tekserip otyrý qajet.
— Ol úshin mázirdi (oń jaq joǵarǵy buryshtaǵy úsh núkte) ashyp, «Baılanystyrylǵan qurylǵylar» bólimin tańdańyz jáne qosylǵan qurylǵylar tizimimen tanysyńyz. Eger ózińizge belgisiz qurylǵyny baıqasańyz, ony tańdap, «Shyǵý» pármenin basý arqyly qoljetimdilikti dereý toqtatyńyz. Akkaýntyńyzdyń buzylǵanyn bildiretin negizgi belgilerge belgisiz qurylǵylardyń qosylýy, sizdiń qatysýyńyzsyz habarlamalardyń jiberilýi, tanystaryńyzdan sizdiń atyńyzdan kúmándi ótinishterdiń kelip jatqany týraly habarlamalar, ózińiz suratpaǵan rastaý kodtarynyń SMS arqyly kelýi, sondaı-aq akkaýnttan ózdiginen shyǵyp ketý jatady.
Rastaý kodtaryn eshkimge bermeńiz, kúmándi siltemelerge ótpeńiz jáne beıtanys adamdardyń nusqaýymen bógde qosymshalardy ornatpańyz. Jeke derekterińizdiń qaýipsizdigine jaýapkershilikpen qarańyz. Akkaýntyńyzdyń buzylý belgileri anyqtalǵan jaǵdaıda, ony qorǵaý boıynsha shuǵyl sharalar qabyldap, quqyq qorǵaý organdaryna júginińiz. WhatsApp messendjerinde ruqsatsyz belsendilik anyqtalǵan jaǵdaıda «Baılanystyrylǵan qurylǵylar» bólimindegi barlyq belsendi seanstardy dereý aıaqtap, eki satyly tekserýdiń PIN-kodyn ózgertińiz jáne akkaýntyńyzdyń buzylýy múmkin ekendigi týraly baılanystaǵy adamdardy habardar etińiz, — delingen habarlamada.
Sonymen qatar telefon men kompıýterdi zııandy baǵdarlamalardyń bar-joǵyna tekserip, SMS nemese messendjer arqyly kelgen rastaý kodtaryn úshinshi tulǵalarǵa eshqashan bermeńiz.
Eger tanysyńyzdan shuǵyl túrde aqsha aýdarýdy suraǵan habarlama kelse, mindetti túrde oǵan telefon arqyly nemese basqa baılanys quraly arqyly habarlasyp, habarlamany shynymen sol adamnyń ózi jibergenine kóz jetkizińiz.
Aıta ketelik Prokýratýra alaıaqtar jıi qoldanatyn tásilderin ataǵan edi.
